ZALEN January 17, 2025 : National Core Committee Member Tawnluia chuan, ZPM sawrkar chuan duhthlan tur an nei chau hle niin a sawi a, "Tuna an dinhmun chu BJP Minister pek nge Zu zawrh, tih a ni deuh mai niin a lang," a ti

Tawnluia chuan, "ZPM Sawrkar hian sum enkawl an thiam loh vangin Financial Crisis an hmachhawn mek a, tuna an dinhmun chu BJP Minister pek nge Zu zawrh, tih a ni deuh maiin a lang. Sum an puk awk awk thin te, oil man an tih san te, buhfai man nasa taka an tih pun te, chhiah an tih pun te hi eng atan nge an hman? Sum leh pai enkawl danah an hlawhchhan chiang hle a ni," a ti bawk.

Vawiina Mizo Hnam Run-a thu a sawinaah Tawnluia chuan, "ZPM sawrkar chu India lakah meikhupin an awm a. Kan Bawm unau nunau nena Mizoram rawn lut tawh 28 pawh Mizoram sawrkar leh Assam Rifle ten tunhnai lawk khan an nawr let leh a ni. Kan unaute thlavang hauh inti ve siin a tak takin engmah an ti tak tak ngam lo a, meikhupin an awm," a ti.

"CM berin pawhin, central thuneihna do ngawt chi a ni lo, a ti a. Sawrkar hmasa leh CM hmasa hmalakna leh tun sawrkar-in kan unaute thlavang a hauh dan chu a inang lo hle a ni. India sawrkar laka unaute thlavang pawh hauh ngam lo sawrkar kan hrawn hi a pawi hle," a ti bawk.