Aizawl May 24, 2024 : Vawiin hian Mizo Hnam Run-ah chhung inkhawm neih a ni a. He inkhawmah hian MNF Adviser TC Pachhunga, Ex MLA chuan thusawiin, "ZPM sawrkar hi a bilhah a tho lo nasa em em a, an insawi ang an ni lo a, mipui beisei an pha lo nasa em em a ni," a ti.

TC Pachhunga chuan, "Chief Minister Pu Lalduhoma'n raltlan chungchangah Central sawrkar a thil phal thu a sawi a. Chutih laiin RTI chhannaa a lan danin central-in raltlan chhawmdawlna cheng khat mah min la pe lo. MNF sawrkar khan zahawm takin kan unau raltlante kha a tuamhlawm a ni," a ti a. "Thla 5 chhung an sawrkar tawh chhung hian tlatluma an insawina Central sawrkar atang hian cheng khat pawh an rawn sawi chhuah sawi tur a la awm lo," a ti bawk.

MNF Adviser chuan, "Sum enkawl thiam loah MNF min puhtute khan vaibelchhe tam tak sum an puk tawh a, SASCI sum thahnem tak an ti lapse bawk. Vaibelchhe 110 thlai thar lei nan an dah thu Larsap-in a sawi a. Pakhatmah financial year hluiah khan an lei lo a ni," a ti bawk.

"Kuhva ro tawlhruk pawh Home Minister Pu K Sangdanga'n, thla khat chhungin kan titawp ang, a tia. An titawp lo nasa em em a, High Court atangin insawifiah turin an ti ta hial zawk a ni. Inremchenna kalpui tura insawi siin MLA hamthatna hrang hrang nasa takin an tipung a. CM Adviser 5 an neihte senso te hi a tam uchuak em em a ni. Nuam an tawl a ni ringawt mai a ni," a ti bawk.

"Contract hna contractor ngeiin an thawk tawh ang, tia an sawi te chu mumang mai a chang zo ta a. ZPM mi leh sa hlir work supervisor an inruat a, contract hna an thawk mup mup mai a ni. Tin, Lei man nasa takin an tipung bawk a ni," a ti a. "Police te nasa takin an tawng a, hrechiang mah lovin an suspend a, thiam an chang leh si a. Police-in an vote an ring lo nge Election-a Police duty 1000 chuangin vote an thlak thei ta lo a ni," a ti bawk.