ZALEN October 22, 2024 : MNF Treasurer Lalruatkima chuan vawiin leh nimin khan Chalfilh bial khaw hrang hrang a tlawh a, ZPM sawrkar chu kum khat emaw pawh an la sawrkar hmain sawrkar tla tur hun tawp lam ang ang maiin kawng tinrengin an buai niin a sawi.

Heng hmunah te hian Pu Lalruatkima chuan thusawiin, "Zoram pumah kawng a chhe em em a, Aizawl khawpuiah ngei pawh kawng an siam tha hlei thei lo. Kan kawngpui ber, kan chaklakna kawng an siam tha hlei thei lo a, kawng hrang hrangin harsatna kan tawk mek a. Petrol leh Diesel man a sang a, lirthei neitute an nuar dawn mek a. Zirlaite Midday meal pawh an pe hlei thei ta lo. Mipui vantlangin ration card kan neih card var lah ni se a letin, kg khat cheng sawmthumah an tisang a. Kawng hrang hrangin Zoram hi a buai nuai mai a ni. Neutral te an beidawng tawh em em a ni. Kum khat em pawh an la sawrkar hmain sawrkar tla tur hun tawp lam hmang ang mai a ni, kawng tinrengah an buai nuai mai a ni," a ti.

MNF Treasurer chuan, "Enchhin a zawnga enchhin fuh lo ber Zoramin kan tawng a ni, tih hi neutral mipuite ngaihdan a ni. Rei lote kan enchhin chhungin mipui kan beidawng der tawh a ni," a ti a. "Kan puk ve lovang, an tih sum te lah chu vaibelchhe 2800 dawn an puk tawh a, a uai rit tawh hle a ni," a ti bawk.

Ruatkima chuan, "MNF kan tho leh dawn, kan hliam hluite dam rawh se. Kan tihsualte siamthain Zoram tan MNF a lo tho chhuak leh dawn. Pathian leh kan ram tan titu MNF hi Pathian vangin a dingchhuak leh dawn. Vawiina kan CM Pu Lalduhoma'n a lo sawi tawh angin, MNF hi zalenna sualtu party kan ni a, Mizo hnam a awmchhung chu a ral dawn lo. MNF a dingchhuak leh dawn," tiin kalkhawmte a chah bawk a ni.