ZALEN September 19, 2025: Vawiin khân Mizo Hnam Rûnah MNF Ṭhalai kaihhruaiin chhûng inkhawm neih a ni a, he huna thusawitu MNF Ṭhalai Vice President Lalnunmawia Pautu chuan, "Lo zawh nuam ti em em Chief Minister leh Minister te hian Sazu puang avanga Buh leh Bal thar tur neilo Lo neitute hi engtiangin nge chhawmdawlna a pek ang tih kan lo thlir reng dawn a ni," a ti.

MNF Thalai Vice President chuan ZPM Sawrkar chu Chief Minister, Minister leh MLA ten Lo neitute thawhrah lawmpui ni awmberin Lo zawh leh a kaihhnawihah phur takin Lo zawhna hun siamin, sum leh pai tam tak an khawhral a. Lo zawh an hmanpui boruak leh thawm thangva a reh hmain, Kanghmun leh Pukzing tlangdungah chuan Sazu te puangin buh leh bal thar tur an nei mumal lo a. Lo neitu thenkhat phei chu zankhat thil thuah Buh hmun zawng zawng a riral vek a. Lo neitute mangang leh lungngaia an awmlaiin, thlamuantu leh ngaihsaktu an nei lo. "Lo zawh nuam ti em em Chief Minister leh Minister te hian Sazu puang avanga Buh leh Bal thar tur neilo Lo neitute hi engtiangin nge chhawmdawlna a pek ang tih kan lo thlir reng dawn a ni." a ti.

Lalnunmawia Pautu chuan, "Chief Minister in Mizoram Assembly House-ah National Strategic Importance atana Central Defence hnena puansak tura a lo ngen thu a sawi a. Mizoram kawngpui 7 zinga Silsuri atanga Bangladesh panna a sawi bak kawngpui dang paruk te hi khawi kawng nge tih Mizoram mipuite hnenah puang turin kan phut a. Heng kawngah te hian Mizoram hian thuneihna kan la nei dawn em? Nge Central Defence hnenah a hralh zawk dawn? tih hi MNF Thalai zawhna a ni" a ti bawk.

MNYF Vice President chuan, CSS hnuaia thawkte chungchang sawiin CSS hnathawktu te chu a lainat thu a sawi a. CSS Employees Regularization Scheme chungchangah Council of Minister in an ngaihtuah tur a nih laia ZPM Coordination in an lo ngaihtuah ve ringawt chu ZPM Sawrkarin mipuite min ngaihpawimawh loh zia leh Democracy tihbawrhban an tumna a nih thu sawiin, "ZPM Party hian an Minister te an rin tawk tawh loh avanga hetianga ngaihtuah mai hi an ni em? tih hi MNF Thalai chuan kan zawhna a ni a. CSS Employees te Regularized chungchangah pawh a thenin dan anga dahngheh theih an nih loh thu an sawi laiin, thenkhat in danlo a lak an nih thu an lo sawi ve mek thung a. Hei hian ZPM Sawrkar mumal lohzia a ti lang chiang hle a. CSS hnuaia hna zahawm tak tak thawktute dinhmun dik leh nihna hi puangin, an harsatna tawh mek hi chinfel sak thuai turin MNF Thalaiin a phut a ni" a ti.

MNF Thalai Vice President chuan, NHM hnuaia thawkte hlawh tur thla engemawzat ZPM sawrkar-in an la pek loh leh MG-NREGS hnuaia hnathawk te hlawh tur Central atanga nuai 1221 an rawn pek vek tawh, ZPM sawrkarin an la pe chhuak lo hi rang taka pe chhuak turin MNF Thalai chuan a phut a ni," a ti bawk.