ZALEN October 8, 2025: Dampa bial bye-election a Congress Candidate, MPCC Vice President ni bawk John Rotluangliana chuan W. Phaileng leh Kawnmawi a tlawh a, Kawnmawi-a Public Meeting a neihna ah mi thar 88-a lawmlut a, lawmluhnaah hian thu sawiin, "ZPM sawrkar hian thil ropui tih engmah an la nei lo. An tih chhun chu chhiah an tipung a, buhfai man an ti pung a, sahuan en man thlengin an tipung a, mipui min sawrfu mek a ni," a ti.

John Rotluangliana chuan, "Kan sawrkar lai, a hminga supply minister ka nih lai khan buhfai hi naupang in thla khatah Kg 5 chauh an dawng thin a, chu chu Kg 8 ah kan ti pung a ni. Buhfai man te hi Cabinet meeting ah pawh tihsan rawtna a awm thin a, mahse mipuite tawrhna tur a nih avangin ka tang tlat a, mipuite tawrh tir ka duh loh thu ka sawi thin."

"Congress party chuan kan ti ang kan tih chu kan ti thin. Mipuite hnenah Rangva kan sem ang kan ti a, kan sem mai a ni. Tunah chuan rangva in nei lo an awm tawh lo a ni. Hruaitu rintlak, dawt sawi ve ngailo kan nei a, kan hotute hi an thutiamah an ding tlat a ni. MNF hi an thutiamah an ding em? SEDP nuaih thum kan sem ang an tih kha nuaih thum chu tunge dawng kan hria em?," a ti bawk.

"ZPM sawrkar-a PWD Minister chuan 'Pu 'Vanlalsailova in thlantlin loh chuan Pukzing leh Silsury inkar kawng laih tur pawh kan ngaihtuah nawn a ngai ang' a ti a, hei hi Democracy kalh a ni." 

"PWD Minister hian lo hre rawh se, he pawisa hi central sawrkar atanga sanction lo kal ani a, an duh duhin an divert thei lo. MLA a min thlang tling anih chuan an divert ka phal dawn lo, a tul chuan Delhi tlang thlengin ka kal mai ang. He hmunah hian Congress MLA turin ka lo kal lo, Dampa bial mipuite MLA turin ka lo kal a ni. MNF leh ZPM te pawhin min vote vek rawh u. MLA ka lo tling anih chuan ka lakah tumah inthlahrung suh u." a ti.