Aizawl July 8, 2024 : Vawiin khan Mizo Hnam Run chhung inkhawm neih a ni a. Er. K. Lalsawmvela MNF Gen. Secretary chuan thu sawiin, ZPM Sawrkar chu mipui sawrkar inti chung siin, an insawi loh dan hlirin an awm, mipuite min zah lo hle a ni, a ti.

Er K. Lalsawmvela chuan, "Tuna kan Sawrkar hruaitu CM Pu Lalduhoma leh a hote hian Inthlan hma khan thu tam tak sawiin, nasa takin an intiam a. MNF leh Congress-in kum 36 chhung min hruai tawh a, heti zawng hi kan ni, tiin, Sawrkar hmasate kha engmah ti lo, chhe lailet derin an sawi a. Thil kalphung pangngai a an tih theih loh tawp tur kan hriat reng pawh ti tura intiamin, Kalphung thar, MNF nilo, Congres nilo sawrkar min enchhin rawh u, tiin serafim state din tur hial angin an intiam a nih kha. Mahse an insawi loh dan ang zelin an awm a, mipuite min zah lo hle a ni," a ti.

Sawmvela chuan, "Buhfai Card var nei tan a man a leta tihpun a, sum tam tak hum theih tura ruahman hi sum vawngtu Finance Department lam tan chuan thil lawmawm tak a ni thei a. Mizoram pumah Ration Card nei chhungkua 2,88,757 zinga 38.86% (mi 1,12,231) card var nei zingah pawi ti lo engemawzat an awm laiin, chhungkaw engemawzat chu a nghawng ngei dawn a ni. MNF sawrkar-in petrol leh diesel man litre-ah Rs.7-a a tih hniam tawh, tun Sawrkar-in 2%- a a tih pun vanga motor chuan man leh thilphurh man a to vanga mipui min nghawng dan tur chu kan hotuten an sawi tawh kha. Hei bakan hian In hmun leh ram in hralh leh hming thlak dawna stamp duty nasa takin an tipung bawk. Chhiah kan tipung lovang, loan kan la lovang, ti thinte hian enge an tih mek leh an tih zel dawn hi mipuiten kan thlir reng a ni," a ti.

"Sawrkar hmasa lamin sum an puk khan, a hmanna tur mipui hrilh si lovin, mípui mín dahkhamin sum an puk vak vak a, leiba an ngah lutuk an ti a. An sawrkar tirh December 2023 atangin kumin April tih loh chu thlatin OMB hmangin an puk a, chutianga an puk chu June thleng hian Rs.602 Crores a ni a. Chu bakah Ways & Means advance hmangin Rs.1,280 crores vel an puk bawk a. Thla 6 lek chhunga an puk belhkhawm chu Rs.1,859.94 Crores a tling der tawh a. Sum puk chhan an mipuite hnenah an puang zar ngai lova, hetianga an kal zel chuan kum 5 chhung chuan Rs 18,600 Cr a tling dawn tihna a ni. Hetianga sum puk vak vak a development awm leh si lo hi a chhan sawifiah se ka duh," a ti bawk.