ZALEN December 8, 2025 : MPCC chuan vawiin khan Congress Bhavan Golden Hall-ah Political Session kan hmang a. He huna thusawitu MPCC Spokesperson Dr. Lallianchhunga, General Secretary ni bawk chuan, ‘Kum 2028 a ZPM sawrkar thlak turin mipuiten MNF aiin Congress min duh zawk,’ a ti.

Dr. Lallianchhunga, MPCC Thupuangtu chuan, “ZPM Enchhin sawrkar kan hrawn mek hi Mizorama sawrkarna siam tawh zingah mipuiin an nin hma ber sawrkar a ni a. Kum 2028 inthlanpuia ZPM thlak tur hian mipuiten MNF aiin Congress hi min duh zawk a. A chhan chu, MNF a sawrkar leh palh chuan sawrkar hnathawkte’n a hun takah hlawh an la thei lo leh ang a, Mizo Nationalism aiin Kamrul-a Contract thawh tur an buaipui leh zawk ang a, politics hmanga Hindu sakhua sawhngheh tumtu Central BJP tha ti chak turin hma an la leh dawn tih Mizoram mipuite hian an hria a ni. Kum 2018-2023 chhung khan an intiamna tihhlawhtlin an nei lo. Nuai thum min tiam a, Traffic jam awm lohna khawpui min tiam a, kawng chhawng min tiam bawk a. Hengte hi tihhlawhtlin an nei lo. Kum 2028 inthlanpui kan hmachhawn turah MNF te hian inzawrhna tur engmah an nei tawh lo a ni” a ti.

Dr. Lallianchhunga chuan, “Congress party in kum 2008-2018 chhung khan sawrkar rintlak, mipuite innghah ngamna tham sawrkar a lo siam tawh a. MNF leh ZPM sorkar nena tehfung hrang hrang hmanga khaikhin pawhin Congress sawrkar kha a tha bik larh a ni. Healthcare -ah ringawt pawh Congress sawrkar tluktu an awm lo. ZPM sawrkar hian damlo 54,261 Bill a pe tawh a. Congress hunlai chuan mi nuai chuangin an chhawr a sin. Sawrkar a hlawh la thinte MR Bill chhiar tel loin, sawrkar hnathawk awm lohna chhungkaw tlemtein MUHC hi an chhawr a ni. Congress hi sawrkar ila chuan Private Hospital te pawhin ngaihngam takin sawrkar Healthcare scheme hi an zawm ngei ngei ang. ZPM Flagship programme ber, Hand Holding Policy hnuaia Loan pek tur pawh Bank lamin an ring zo lo. ZPM sawrkar a tlak hnuah sawrkar tharin a chhunzawm sak duh zel dawn em, tih an ngaihtuah a ni. Hand Holding Loan atan Bank in a hranin sum a nei lo, chuvangin Housing Loan pek chhuah thlengin a nghawng, tih sawi awm te hi a pawi asin,” a ti bawk.

Dr. Lallianchhunga chuan Chief Minister Lalduhoma chungchang sawiin, “April 2,2018 khan Mizoram leh HPC-D ten inremna ziakin, kum 20 zet sawrkar laka helna chu tihtawp a ni ta a ni. Inremna Thuthlung angin Sinlung Hills Council (SHC) pawh din a ni a, remna leh muanna hnuaiah inthlan tum 2 lai buatsaih tawh a ni a. Mipui thlan chhuah ten an huam chhungah hmasawnna an kalpui mek a ni. Hun kal tawha kan hruaitute haw tur zawnga thusawi a ching hi a tha lo takzet a ni,” a ti.