ZALEN July 31, 2024; MNF party chuan mipui min dahkhama ZPM sawrkarin sum an puk chu Rs. Vbc. 1949.94 a tling tawh tih an tarlang.

Vawiin (31.7.24) chhun dar 12 khan MNF media & publicity hruaituten Aizawl press club-ah thuthar thehdarhtute kawmin he thu hi an sawi. "An inzawrh laia sum kan puk ve lovang, ti siin, OMB atangin Rs. Vbc. 692 an puk tawh a, Ways & Means Advances atangin Vbc. 1257.94 an puk tawh," an ti a, mipui min dahkhama a vaia an sum puk tawh chu Rs. Vbc. 1949.94 a tling niin an sawi.

Cabinet leh MoS rank, OSD to CM, Consultant, MLA hamthatna tihpun, board chairman hlawh tihpun, AMC, LMC te hlawh tihpun etc. vangte leh ZPM sawrkar uchuak taka an inhaivur avangin kum 5 chhungin sawrkarin Rs. Nuai 13,415.84 sen belh a ngai dawn niin an sawi bawk.