ZALEN October 14, 2024 : Vawiin Hnam Run chhung inkhawma political session-a thusawitu MNYF President Robert Romawia Royte, MLA chuan ZPM sorkarin Mizo hnam issue pawimawh tak tak a ngaihthah chu pawi a tih thu a sawi.

Robert Romawia chuan, "Mizoram leh Myanmar inkara zalen taka inkalpawh phalna Free Movement Regime(FMR) hlih chungchang te, Myanmar ramri hung chungchang te, thenawm ram leh state atanga Mizo raltlan ngaihven chungchangah te, Assam nena ramri chungchangah te sawrkar anga Mizo hnam humhalh a tul em em laiin ZPM sawrkar hian mipui beisei angin hma a la lova. CM zahawm takin vairam media thleng a dawihaw a chhuah hi a pawi tak zet a ni," a ti.

"Mizo khaw hlun tak Phuldungsei khuaa Mi 85 te Mizoram ration card atanga ZPM sawrkar in a paihchhuak phei hi chu a serious takzet a. Heng Phuldungsei khuaa India ram dan anga an Ration Card leh Adhaar card Online a link vek tawh a ni, sorkar hian an Adhaar Card nen an Ration Card nen Online in zawm leh vat turin kan phut a ni," a ti bawk.

MNYF President chuan tunlaiin dawt leh thudik famkimlo a leng vel nasa a, thudik puanzar tam a tul a ni a ti a. Assembly Session a MLA te zawhna Ministers ten an chhanna te chhiar chhuakin Robert-a chuan C.Lalsawivunga Minister chhanna chhiar chhuakin PMJVK atan vaibelchhe Rs 2186.77 lai Central sawrkarah projects thehluh a ni a, Sports Deptt leh ICT Deptt chauhvin sum vbc 420 vel hmuh a ni. SASCI chungchanga zawhna pawh PWD Minister Vanlalhlana'n SASCI hnuaiah dan dik lova hna inpek a awm lo tiin a chhang a ti.