Aizawl September 5, 2024 : MPYCC chuan ZPM sawrkar hnuaiah Aizawl khawpui chhung leh Mizoram hmun hrang hranga in kal pawhna kawngpui a chhe hle. ZPM sawrkar chuan fur lai a nih avang ni lovin mimal induhsak zawkna avanga hna hrang hrang an thawh laiin khawpui chhung leh pawn kawngpui a ngaihsak lo. Fûr lai chhuanlama hmanga kawngpui a ngaihsak lo hi lirtheia eizawngte leh a chhawrtu mipui an ngaih pawimawh loh zia a ti chiangah an ngai.

Congress sawrkar kum 2018-a mipuiin chawl rih tura an tih hnua December 15, 2018-a sawrkar thar MNF sawrkar lakluh a nih khan Ministry hmasa Congress sawrkar khan kawngpui siam nan Mizoram PWD-ah sum engzat nge a hnutchhiah? tih zawhna Assembly House chhanna atanga a landanin cheng nuai 8595.19 a hnutchhiah tih tarlan a ni.

Sawrkar kal ta, MNF sawrkar liam ta khan sawrkar thara kawngpui siamna atan Mizoram PWD ah cheng engzat nge a hnutchhiah ve tih hi Congress thalai zawhna a ni a. Ministry kal ta khan sum a hnutchhiah ve lo nge ZPM sawrkar hian kawng siamna tur pawisa a nei lo tih hi Congress thalai zawhna a ni, an ti bawk.

ZPM sawrkarin kawng siam a ngaihthah em avangin lirtheia eizawng, lirthei hmangtu leh mipui nawlpuiin harsatna nasa taka kan tawk hi Congress thalai chuan pawi a ti takzet a ni.