ZALEN January 25, 2026: Zoram People Movement (ZPM) thalai President Jeje Lalpekhlua, MLA chuan mipui hriselna atana a insenso ZPM sawrkarin a hreh dawn lo tih sawiin sawrkar hmasate angin damlote bill rei tak tak bat a la awm lo niin a sawi.

Nimin khan Aizawl press club-ah thuthar thehdarhtute kawma he thu hi sawiin, Jeje Lalpekhlua chuan, April 1, 2025 atanga January 16, 2026 thleng khan MUHCS hnuaiah damlo 68,022 enkawl an nih thu leh an senso Rs. Vbc. 115.25 pawh sawrkarin a pe tla tawh tih a sawi.

Jeje Lalpekhlua tar lan danin ram pumah grace period September 16, 2025 thlenga MUHCS-a inziak lut hi chhungkua 20,198 an awm a, an zinga 17,705 (87.65%) chu general ward hnuaiah an ni a, semi private ward hnuaiah chhungkua 1,602 (7.93%) leh private ward hnuaiah 891 (4.41%) an awm a. MUHSC-ah hian sawrkar hnathawk leh an chhung te, sawrkar hnathawk pensioner, sawrkar hnathawk pension chhungte leh ABPM-JAY (golden card nei) te thun luh sa an ni.

Tun dinhmunah Mizoram chhunga chhiattawkte ruang 1,680 ZPM sawrkarin a phurhsak tawh tih sawi bawkin ZPM thalai president chuan ruang phurhna atan hian Rs. 175,85,602 hman a nih tawh thu leh he scheme hi an sawrkar chhung chuan kalpui chhunzawm zel an tum thu a sawi.