ZALEN August 05, 2026 : ZPM Thalai General Headquarters chuan thuchhuah siamin, CM-in ILP chungchang zep nei lo leh tlang takin a sawi niin an ngaih thu an tarlang.

An thuchhuahah hian Memorandum of Settlement 1986 chungchanga Chief Minister Lalduhoma’n Pu Laldenga tanhmun chungchang a sawinaah MNF tan huat tur a awm an hriat loh thu an tarlang bawk a ni.

July 31, 2026 a Chief Minister Lalduhoma’n Mizoram Law College Freshers Social & Felicitation Programme a hmanpuinaah Inner Line Permit leh Memorandum of Settlement 1986 chungchangah opposition party te ang lo takin zep nei lo leh tlang takin thu a sawi niin ZPM Thalai thuchhuahah chuan an tarlang a. ILP chungchanga Mizoramin a tih theih chin leh a din ngheh theih chinte tlang taka sawiin, ILP chu hmansual theih a nih thu leh hmansual a nihin Mizoram sawrkar chu Court-a khin a niha a chak loh chuan ILP hi paihsak theih kan ni tih a sawi niin an tarlang a ni.

Adaptation of Laws Order 1950 hmanga kan chhawm Inner Line Regulation hi Mizoram tana inhumhimna a nih rualin, hmansual theihna laka inveng tura Law zirlaite a fuihna thuah dawihzepna an hmuh ve loh thu an tarlang a, thangthar ten thil nihna dik tak leh tan lak a ngaihna lai dik taka kawhhmuhtu Chief Minister Lalduhoma chu ZPM Thalai General Headquarters chuan an ring tawk hle tih an tarlang bawk.

Politics ze hlui sim thei loin August 4, 2026 ah khan Congress party chuan Chief Minister Lalduhoma chu thudik a sawi avangin poster hnaisai lo tak an siamsak nia tarlangin, mipui hmuh theih turin khawlaiah an tar chhuak hial tih an tarlang a. Hetianga inbeihna tenawm tak, Kristian te tih atana mawi lo khawp laka Congress party te an inveng zo thin lo chuan ram hruai tlak an nih lohzia a tilang chiang nia an hriat thu tarlangin, sim tawh turin ZPM Thalai General Headquarters chuan an chah thu an tarlang a ni.

MNF party pawhin thuchhuah siamin Chief Minsiter Lalduhoma beih let nan total bandh an sawi ri tih tarlangin, an nihna dik tak hai lan a nih apianga total bandh hmanga inhliahkhuh an chin thin chu simin, thil nihna dik tak hmachhawn ngam zawk turin MNF party an chah a, Mizoram mipuite pawhin MNF thil tum chu zawmsak lo turin an ngen bawk a ni.