Aizawl February 3, 2023: ZPM Thalai Hqrs. President Dr. C. Lalrammawia leh ZPM Thalai G.S- te'n Mizoram State Cancer Institute (MSCI) chu a hmunah kalin a dinhmun an enfiah a, Khawl enkawltu technician indaih a la nih loh avangin khawin a theihna a la hmang thei lo chu pawi an tih thu leh Chemo lakna hmun panna a wheelchair hman theih a ni loh avangin lift hman a nih theih nana hmalaturin thuneitute an ngen.

ZPM Thalai chuan Mizoram State Cancer Institute-in khawl tha tak tak leh thawktu inpe tak tak a lo nei chu lawmawm an ti a. Heng khawlte hian enkawltu technician sawm tal a mamawh laia mi paruk chauh an awm avanga thawktu indaihlohna chuan khawlte an theihna (capacity) anga hman theih an la ni lo, tiin pawi kan tih thu an sawi a, Sawrkar chu cancer veite hmakhua ngaia Technician dah belh thuai turin an ngen a ni.

MSCI building ZPM Thalai-te'n an tlawhna ah hian Block-II building, lânga damlote chemotherapy an tihna hmunah wheelchair-a innawr theihna kawng (ramp) a awm lo, an ti a, damlo chau tak takte step-ah puak an ngai thin an ti a, he building-a lift an siam chu hman thuai a nih theih nan chak taka hma la turin thuneitute an ngen bawk a ni.

Dr. C. Lalrammawia chuan, "Mizoram hi cancer vei tamna State kan nih avangin cancer veite enkawlna tha kan neih a tul hle a, khawl leh mi thiam kan neih tawk loh avanga sum tam tak senga harsa taka phaia inenkawl tura kan kaltir thinnate hi kan tihtlem theihna tur sawrkar-in nasa zawkin hma la se," a ti.