November 1, 2023; Nimin (31.10.23) khan ZPM thalaite chuan Cyber Crime Police Station leh Chief Judicial Magistrate hnenah complaint an thehlut.

ZPM thalai thuchhuah a tarlan a nih danin, ni 30.10.2023 zan khan social media-ah James K. Hmaa inti chuan, 'ZPM leh Meitei-ho thawhhona thuruk,' tiin dawt thu hmanga ZPM beiin, Zoram hmun hrang hrangah social media hmangin he dawt thu hi a darh mek a, he message hi ZPM thalai chuan a ngai thu tak hle a, hetianga dawt thu theh darhtu hi man chhuah a nih a, a chungah hremna lek a nih ngei theihna turin  ZPM thalai vice president Zoramchhana chuan ni 31.10.2023 hian Cyber Crime Police Station leh Chief Judicial Magistrate-ah complaint a thehlut.

'Mizoram politics-ah Pathian ram lo thleng rawh se' tih hi ZPM party innghahna a ni tih tarlang bawkin, Zoram dinhmun hetiang a la nih laia dawt thu au pui chu an khingpui party-te chaw tui ber a la ni, an ti a, lungchhiatthlak an tih thu te, politics hi ram leh hnam tana thil tha tih kawnga inelna lo ni zawk rawh se, tih chu ZPM thalai dinna a ni tih an tarlang.