ZALEN Feb 16, 2026: ZPM ṭhalaiin Mizoram a sawrkar hmun pawimawh leh sawrkar ramte khauh zawka humhalh turin mipui an ngen.

Mizoram chhunga sawrkar department hrang hrang ten an ram an chan nasa tawh hle tih tarlangin ZPM ṭhalai chuan, hei hi a bulpui berah chuan sawrkarna lo siam tawh party pahnih ten vote zawn nan leh politics khelh nan department ramte an lo phalrai thin a, sawrkar department ten department ram humhalhtu committee din hial a ngaih phah ta a ni, an ti a, heng committee te hian an department ramte hi humhallh thin mahse, politics leh khawtlang a lo inrawlh tawh chuan a dingchang lo zawkah an tang ta thin a, hei hian kan sawrkar hnathawk te rilru pawh a hliam thin a ni, an ti bawk.

Hetiang a nih mek lai hian, 2023 MLA Election dawnah Aizawl West-III MNF Candidate chuan Bungkawn venga Home Department ram, CID Complex chu khawtlang hnena pek a lo tiam avangin tun hnaiah mi thenkhatin CID Complex chu Bungkawn veng tana pe turin dilna an siam tih an tarlang.

Vawiin (16/02/2026) vek hian Kolasib khawpui chhung leh a chhehvel kawngpui Bituminous concrete-a chhunmam mai theih tura siam mek chu Opposition Political Party hruaitute fuihpawrh theih thalai thenkhat te chuan kawngzawhin hmasawnna kawngsiam hnathawk mek tute tan harsatna siam zawngin hma an la tih tarlang bawkin, heng thil thleng hi ZPM Thalai chuan pawi a ti tak meuh a, heng thilah hian a meizang hlaptu ber leh a kaihruaitute hi oppposition party mi lehsa an ni tih report an dawng tih an tarlang bawk.

"Sawrkarin theihtawp chhuaha hmasawnna tura hna a thawh mek ti thuanawp zawnga hetianga Thalai rilru thianghlim hruaikawitu opposition party te hi ZPM Thalai chuan a dem tak zet a ni.

Ram hruaitu hmasa ten Vote zawnnan mipui rilru kalsual thei zawng a tawktarh an lo nei thin leh mipui hmaa inzawrhnan an lo hmang thin kha ZPM Thalai chuan pawi a ti takzet a. Tun chinah Political party ten sawrkar department ram tawktarh zawng leh hmasawnna hnathawh mek tithuanawp zawnga khawtlang mipuite rilru hruaikawi tawh lo turin ZPM Thalai General Headquarter’s chuan kan ngen a. Sawrkar ram pawh hi mipui ta tho a ni a, mahni ta a nih anga sawrkar ram humhalh kawngah sawrkar theihtawpa pui zawk turin Mizoram mipuite kan sawm bawk a ni," an ti a.

"Sawrkar thutlukna leh hmalakna te pawh Khaw bil leh Veng bil aia zau zawk thlir a, Mizoram tana a tangkaina zawn thlir chunga sawrkar lo thawhpui zel turin Mizoram mipuite kan ngen tak meuh meuh a, hun rei tak ngaihthah tawh thil tam tak siamthat ngai te siamthat kawngah harsatna kan lo tawk a nih pawhin thil tha zawk lo chhuahna tur a ni tih hria a lo dawh hram hram turin ZPM Thalai chuan Mizoram mipuite kan ngen a. He ZPM sawrkar hi Mizoram mipuite tan ding a ni a, ram leh khawtlang thatna turah chuan huaisen takin a ding tlat zel dawn a, chumi kawngah chuan Mizoram mipuite pawhin sawrkar lo thawhpui tlat turin ZPM Thalai General Headquarters chuan kan ngen a ni." an ti bawk.

#ZalenNews