ZALEN October 17, 2023 : ZPM General Secretary Eddy Zosangliana chuan ZPM thlawptu MLA panga te chu khatihlaia Assembly Speaker Lalrinliana Sailo thurawn angin banna an thehlut a ti a, buaina awm miah lova ZPM Party Official Candidate ni tura inthlan chu an thlang ta a ni, a ti.

Vawiina thuthar thehdartute a hmachhawn naah Eddy Zosangliana chuan, "Assembly Speaker Lalrinliana Sailo khan Speaker a nihna atangin a bang dawn tih kan MLA te kha a hrilh lawk a, a chhan chu, MNF Party rilru puthmang a hriatchian em avangin, Speaker atanga a ban hma ngeia MLA atanga banna thehlut turin thurawn a pe a ni. Speaker Lalrinliana Sailo kha lo bang hmanin, a ban hnuah ZPM thlawptu MLA te hian MLA atanga banna thehlut ta se, MNF Party hian tihkhawtlai dan zawngin an banna an pawmsak duh loh luih a rinawm a, a chhan chu 2023-ah heng MLA te hi thlantlin leh niin ZPM in sawrkarna siam khawp MLA nei ta se, ZPM sawrkar tih tlak nan hek lehna remchang atan an tih ngei a rinawm a ni. Chutiang rilru pu duh tur khawp nia a hriat vang a nih a rinawm a, Assembly Speaker khan duhsak takin Speaker atanga a ban hma ngeia banna thehlut tur khan ZPM tlawptu MLA te hi thurawn a lo pe a ni," a ti.

ZPM General Secretary chuan, "Dan hian Independent a thlan tlin te pawh a phuar tho avangin ZPM thlawptu MLA te hi Dan ang chuan Independent atanga thlantlin MLA an la nih miau avangin, party dangah an va in candidate dawn chuan MLA an nihna atanga an ban a ngai a, an ban loh a, party dang atanga candidate an nih a, ZPM Leader Lalduhoma chunga thleng ang khan itsikna rilru pua hektu an lo awm leh palh hlauh a, buaina hmachhawn ai chuan Assembly Speaker Lalrinliana thurawn angin banna thehluh a, buaina awm miah lova ZPM Party Official Candidate ni tura inthlan chuh hi an thlang ta zawk a ni," a ti bawk.