Aizawl October 18, 2023: ZPM Tawngtai Committee, ZPM General Headquaters buatsaihin vawiin khan Serchhip Sub-Headquater YMA Hall-ah tawngtai retreat neih a ni. Tawngtaihona neih a ni a, ZPM leader Lalduhoma leh ZPM Vice President Rev. Dr.K. Thanzauava ten thu an sawi a, Mizoram hruaitu atana Hriak inthihna hun hman a ni bawk.

ZPM Leader Lalduhoma chuan," Kohhranin corruption kan vei ta hle a. Synod pawhin, ‘corruption laka fihlim lo te chungah thuneihna nei lo mah ila, heng laka fihlim lo te chu rawngbawlna langsarah dah loh nise, danin thiam loh a chantirte chu Kohhranin thunun ni rawhse’ tiin a rel ta hial a. Eirukna laka kan lo fihlim theih nana Kohhrante hmalakna hi a lawmawm hle a ni. Kan ram hruaitu ten central-ah sum zuk sawichhuak thin mah se, an mahni bawkin an eiru leh thin a, an hnuaia thawk party worker thenkhat ten an pu te eiruk an la sawi mam sak leh zel te hi thil mak a ni," a ti. 

Lalduhoma chuan, "ZPM candidate te erawh chuan ‘Ka eiru lovang’ tiin an tlangau mek a, mipuite pawhin ZPM chungah rinna an nghat mek a, he an rinna nghah hi kan lo sawrkar a nih chuan kan tithlawn dawn lo va kan eiru dawn lo a ni. ZPM chuan chhung lam leh pawn lamah beihna tam tak tawk thin mah se, vawiin thlengin Pathianin min la hruai zel a, tawngtai pawl ten tawngtaina nen nasa taka tan an lakna te hi Pathian hian a hria a, an tawngtai chhanna vawiin thleng hian kan la hmu zel a ni," a ti.

Rev. Dr. K. Thanzauva chuan, "Serchhip chu ram lai li, Chief Minister bial ni rei ber in ni a, thlai thar thawn chhuak hnem tak district in ni. Mipuite rilru a nghet em em a, Pu Lalduhoma pawh hi in phatsan mai mai ka ring lo," a ti. “Mizoramah Kohhran tha tak kan nei a, hetiang taka Kohhran inrelbawlna tha hi khawvel hmun dangah hmuh tur a vang khawp mai. Chutih lai mekin politics huangah erawh kan tha lo a, hei vang hian thinlung zawng zawnga Pathian kan auh hi a hun ta a ni," a ti bawk.

Rev. Dr. K. Thanzauva hian ZPM Leader Lalduhoma chu Mizoram hruaitu a tan hriak a thih a, hnung tawlh lo va hmalam pan zel turin Mizo danin tawlhloh puan a bahtir hnuah a Lu chungah kut nghatin a tawngtaisak bawk a ni.