Aizawl: Zoram Peoples Movement (ZPM) thalaite chuan Bairabi rel station-a rel passenger-te hnena ILP check thuai tur leh state pawn atanga thlai lo lutte a hrisel leh hrisel loh endikna siam thuai turin Mizoram sawrkar an phut tih an sawi. Nimin khan Aizawl Press Club-ah chanchinbu mite kawmin ZPM thalai chairman Lalmuanpuia Punte chuan Mizorama chawkluh thin thlaite chu a chingtu hnam dangten an enkawlnaah mihring tana hlauhawm an hmang nasa hle niin a sawi a. “State pawn atanga thlai chawkluhte a hrisel leh hrisel loh endik lama hma la sawrkar kan la nei ngai lo hi pawi kan ti a. Hei hian sawrkarin mipui hriselna leh himna a ngaihthahzia a lantirah kan ngai a, sawrkar kan neih tawhte kan dem hle a ni,” a ti. Lalmuanpuia chuan January ni 24 leh 31 khan Bairabi YMA chuan state pawn atanga lakluh, thlai hrisel lo 207 truck trip 5 an paih niin a sawi. ZPM Thalai Vice President VL Thazuala pawhin Bairabi rel station-ah ILP enfiahna a la awm lo tih sawiin  DC-in a hawn hnuah pawh counter-ah hian ILP check a la ni ta chuang lo tih a sawi a. ZPM Thalai Vice President chuan Bairabi rel station-a ILP counter-ah hian LDC 1 leh Peon 1 dah an niin vawiin thlengin ILP pekchhuah a la awmlo niin a sawi a. Hnam dang rela lokalte chuan Police check gate helin mi thahnem tak an lo lut thin niin Press mite a hrilh bawk.