Aizawl: Kum 2015 atanga Mizoramah zu zawrh anih atangin zu chhiah, chawitir leh zu card atangin vaibelchhe 237 chuang hmuh a ni tawh.   Zalen thudawn danin zu zawrh tan 1.4.2015 atanga 31.3.2016 inkar chhung khan zu chhiah chi hrang hrang atang hian Rs. 60,60,47,664 hmuh a ni a, 2016-2017-ah Rs. 72,26,21,797 hmuh a ni a, 2017-2018-ah Rs. 65,68,58,696 hmuh a ni bawk a, April 1, 2018 atanga ni 31.10.2018 inkar chhung khan Rs. 39,25,22,889 hmuh niin zu chhiah atanga sum hmuh zawng zawng hi a vaiin Rs. 2,37,80,51,046 a tling a ni.   Tun dinhmunah Mizoramah zu laluttu ‘bonded warehouse licence’ nei mi 3 an awm a, chungte chu RTP bonded warehouse, SS Enterprise bonded warehouse leh Rafael Enterprise bonded warehouse te an ni.   Zu dawr nei mi 54 awmin Bar licence nei pahnih Aijal Club leh Ritz Hotel te an awm bawk. September thla tawp thleng khan Mizoramah zu lei theihna ‘liquor card’ nei mi 32,294 an awm a, zu card nei te hian thla khatah zu um 6 leh beer/wine um 10 an lei thei a ni.