ZALEN Dec 17. 2024; Chief Minister Lalduhoma chuan, "Zu khap burna dan (Mizoram Liquor Prohibition Act) chu uluk tak leh fimkhur taka ennawn mek a ni," a ti.

 ZPM party in nimin (16.12.2024) a pisa kharna hun an neihah thu sawiin Chief Minister Lalduhoma chuan, "Kan hmalakna reng reng hian a tum ber chu ram rorelnaa kalphung dik (Administrative reform) a nih rualin, chhung rila dikna kan neih theihna tura kalphung thar mipui sorkar hmalakna a ni a. Kan ram rorelna kalphung a lo dik theihna turin kawng tam takin hma kan la mek bawk a, kum khat chhungin kalphung thar mipui sorkar hian ram rorelnaah danglamna tam tak kan thlen tawh a ni,” a ti. Chief Minister chuan, "Thlai thar lei chungchangah campaign laia kan lo sawi tawh thin angin collection centre hmun tam takah kan siam chho mek a, chung collection centre ah chuan kan kuthnathawktuten sorkar rate aia hniama Sawhthing man a tlak a piangin an rawn hralh thei dawn a ni,” a ti bawk.

Home Minister K.Sapdanga pawhin thu sawiin, “Kum 2013 a sorkar thar lo piang khan Krismas leh Kumthar vuak veta halpuah halna hmun leh hun tur a siam avangin namen lovin halpuah leh halmawi kan lo uar leh ta viau mai a, hei hian damlote tan harsatna nasa tak a siam bakah Air pollution Index a ti sang hle a, chuvangin sorkar thar chuan halpuah leh halmawi hal hi a khap tlat a. Mipuite pawhin sorkar hmalakna hi min tlawp theuh turin kan ngen bawk a ni,” a ti bawk.