ZALEN Nov 21. 2025: Excise & Narcotics Department chuan Zu leh ruihhlo thahnem tak an man.

Excise & Narcotics Department, FGT (BSF), Aizawl leh 191 BSF thawkho chuan November ni 19, 2025 (Nilaini) tlai dar 4:24 khan Tuikhurhlu (Edenthar)-ah Heroin gram 707 (Hawng 49) leh Methamphetamine Kg 14 & gram 905 (Tablet 1,50,000) leh a neitu nia puh mi pahnih – Nangsianmuanga (21) s/o Kamsuanmuang, Khawmawi, Myanmar leh Nangsiansiam (18) s/o Zamthawnkim, Sezang, Tiddim, Chin State, Myanmar-a khawsa nia inchhalte an man.

An hnen atang hian Mobile Handset 2 leh Scooter 2 hrensak a ni bawk. Heng ruihhlo an mante hi Myanmar atanga lak, State pawn lama tihral tura ruahman mek a ni.

Heroin leh Methamphetamine neitute hi The Narcotic Drugs & Psychotropic Substances Act, 1985 tlawhchhanin thubuai siamsak an ni.

Excise & Narcotics Department chuan November ni 19, 2025 (Nilaini) zan dar 9:00 khan Falkland East Venga Kudam pakhat atangin Zu um puitling (750 ml) hrang hrang - Royal Stag Whisky, Signature whisky, Blenders pride whisky, Iconiq white whisky, Royal Stag barrel whisky, Royal Green Whisky, Afterdark whisky, Malt in Black whisky, Old Monk Rum te bakah Kingfisher Beer (500 each) can 84 zet man a ni. Zu man zawng zawng hi Um 2,940 (Case 245) leh Beer Case 3 chuang zet a ni. He Kudam luahtu leh zu neitu Ruthi Lalrammawii (31) d/o Lalramlawma, Phunchawng mel-6 nia inchhal pawh man nghal a ni a, MLP Act 2019 tlawhchhanin thubuai siamsak a ni.

#ZalenNews