ZALEN March 5, 2026: Assembly budget session neih mek, vawiin zawhna leh chhanna hunah house leader Lalduhoma'n Gangtok a an zinna-ah zu rui a puh a nih chungchang a sawifiah.

House leader Lalduhoma chuan, Gangtok a an kal chu kum 20 liam ta kum 2006 a nih thu sawiin, ni 1 an cham thu a sawi a. "Kan thlen hun tak ka hre ta lo, 1:45 vel niin ka hria," a ti bawk.

"PAC chairman ka nih lai a ni a, R Lalzirliana MLA, Lalrinliana Sailo MLA, D Thangliana MLA, Vanlalthaliana MLA leh official pahnih kan kal a, kan hlim em em a, hlim takin kan kal a, hlim takin kan haw a, khatiang thil kha thleng ni se kha tih lai khan a ri hluai ang tih chu thil chiang sa a ni. Kum 20 liam tawh hnu a phuah chawp a thil kan ti hi a pawi ka ti..." tiin Lalduhoma chuan a sawi.

Speaker Lalbiakzama chuan, 3.3.2026 a Robert Romawia Royte-in house leader Lalduhoma chungchang a sawi chu house record atangin nawh reh a nih thu a puang bawk a. Speaker chuan he thu sawitu Robert Romawia Royte pawhin a thusawi chu nawh reh a duh tih a sawi bawk.

#ZalenNews