Aizawl; Mizoram khawchhak lama Grape chingtute chuan Mizoram sawrkarin zu khapna dan a siamthat dawn avangin an grape te an hralh tha theilo tih sawiin sawrkar chu grape atanga zu chi khat Bandy leh Rum siam phalsak mai turin an ngen. Zalen palaiin Hnahlan Grape Growers Society hruaitute a biak naah Society hruaitute chuan sawrkarin zu khapna thlahdul a tum thu a sawi atangin Zawlaidi chu hralh a kal lo sawt tih an sawi a. "MLPC Act ah hian kan tan hamthatna tur a awm ve loh chuan keini chu kan tawp dawn tihna a ni mai a. Brandy, Rum leh Cooking wine te kan siam thei a, hei hi siam min phalsak lo emaw, tuna Zawlaidi a 11% alcohol hi min tihsan saklo anih emaw tax hi min awl theilo anih chuan kuthnathawktute tan chuan kalngaihna a awm tawh dawn lo a ni," an ti. Kumin ah hian Hnahlan khua chuan grape an thar tha a, a vaiin quintal 6000 vel an thar a, a hnu nawi tihloh chu grape hi an lo zo tawh a ni. Hnahlan Winery hian kumin ah quintal 1800 vel an la thei a, an lei bak hi kuthnathawktute chuan an thiam ang angin an um (local process) ve mai thin a ni.Hnahlan Grape Growers Society hruaitute chuan tun dinhmunah grape tui 'Zawlaidi' hralh ban litres 20,000 chuang an la nei niin an sawi a, mipui ta chu sawiloh Society member te thar ngei pawh an lei zawh sak thei lo chu hrehawm an ti hle niin an sawi. Hnahlan ah hian in 600 vel awmin chhungkaw tam ber chu grape huan siama eizawng an ni a, grape atanga concrete in sa leh motor lei engemaw zat an awm tawh niin an sawi a. Winery hian grape hi kg.ah Rs.35 in an la thin a ni.