Aizawl: Mizoram sawr-karin March ni 16,2015 (Thawhtanni) atanga dan thar Mizoram Liquor Prohibition & Control Act hnuaia zu zawrhchhuah tan a tumnaah harsatna a tawk a. Zu zawrh tumna veng 5 zinga veng 4 chuan an veng huam chhunga zu zawrh an remti lo. Wine shop hawn tumna veng nia sawi Chaltlang North a kohhran hrang hrang leh NGO te nimina kalkhawm chuan an veng huamchhungah zu dawr (wine shop) leh zu dahkhawlna (ware house) awm an remti lo tih resolution siamin an pass a, hemi kawnga hma latu tur JAC din nghalin an hmalakna chu zahsak turin sawrkar an ngen bawk. Nimin meeting ah hian an veng chhunga kohhran hrang hrang zingah Baptist tihloh chu an tel vek a, kohhran bakah YMA, MHIP, MUP, GSA leh Lily veng Cultural and Drama Club te an tel a. Member 7 awmna Local Council ah rorel lai Congress member 4 te chu meeting ah hian an tel lo a, MNF lam member 3 erawh an tel thung. Chaltlang North bakah hian zu zawrh tumna veng nia sawi Chanmari, Vaivakawn, Tuikual South leh Khatla te chuan an veng chhunga zu dawr awm an phalloh thu an sawi bawk. Hetih lai hian zu dawr hawn tumna veng Dawrpui chuan aw an la neilo thung a. Zalen-in a biaknaah Dawrpui Branch YMA President Lalrammuana chuan sawrkar hmalakna do zawnga thil tih rup rup chu an duhlo tih a sawi a. "Sawrkar hmalakna ngaichang phawt ila, wine shop in kan veng a ti tawp ta viau anih chuan titawp turin sawrkar ngen leh mai kan tum a ni," a ti a. Dawrpui chu mi zawng zawng lenna veng ah siam an tum tih a sawi. Sipai bang, Mizoram Veteran Multipurpose Cooperative Society ten an office, Treasury Square a an member te tana zu dawr hawn an tum, Tuikual South khawtlangin an dodal chungchangah nimin khan Ex-Service League Office ah sipai bangte leh Tuikual South khawtlang hruaitute an inkawm a.Mizoram Veteran Multipurpose Cooperative Society lam hian inbuatsaihna thui tak kalpuiin pawisa pawh nuai 2 chuang an seng tawh tih sawiin Tuikual South khawtlang chu inngaihtuah nawn turin an ngen a. March ni 19 ral hmaa an thutlukna inhriattir leh turin an inthlah niin Ex Service League President Col. John Zama chuan Zalen a hrilh.