ZALEN December 20, 2024 v Ration buhfai semchhuah tûr sawrkar kudam (Go-Down), Zuangtui-ah a awm lo tih thu an dawn vang leh mipuiten hunpui laia Ration buhfai-ah harsatna tawh an hlauh vangin Congress thalai chuan vawiin khan kudam hi an tlawh a, Retailers te pekchhuah tur Buhfai a awm lo niin an sawi.

Congress Thalai chuan Mizoram Retailer hrang hrangah December thla Ration Buhfai a thena sem a, a thena semloh a la nih chhan leh Kudam-a Buhfai semchhuah Retailer-te lak tur a awm lo a ni tih an dawn vangin an finfiah tih an sawi. Krismas laiin Buhfaia harsatna hi thleng thei dawna an hriat vangin an tlawh a, Mipui te hlauthawnglo turin an chah nghal. 

MPYCC President Laltawnliana chuan, sawrkar tihmualpho tum vang hrim hrima kal kan ni lo a, mipuiten an hnena an manganna an rawn thlen vanga Kudam hi tlawh kan ni tih a sawi a. Amaherawhchu Retailer tinah Buhfai pek chhuah kim a nih thu a thawkten an lo hrilh vangin Mipuite thlaphang lo turin a chah a, Opposition mah ni se Sawrkar hi mipui tâna an thawh that chuan an lawm a, an thlawp a ni tih a sawi.

A hunah chuan Sawrkar hi an diknaah chuan puih leh thlawp an inhuam reng a, mahse mipui ten an chanvo tur a hun taka an chan loh a, mipui tawrhna a thleng dawn a nih chuan huai takin mipui tan ke an pen zel dawn a, chuvangin mipuite pawhin harsatna an neih te inthlahrung lo a, bengvar puia hrilh zel turin an ngen tih a sawi.

Retailer tam takin Buhfai sem tur an neih har deuh avang leh a hun taka mipuiin an dawnglo pawh hi Sawrkar lam pawhin Opposition beng thlen kher hmaa hma la tur leh an inzawrh ang ngeia mipui tana tun aia nasa leh Sawrkar kal tawhte aia thil ti theia mipui a inzuar an ni tih inhre thar leh zual turin a ngen bawk a ni, a ti.

Tawna chuan Ration Buhfai man 100% a ZPM sawrkarin a tih to tâk avangin Kohhran hrang hrang Buhfaitham hi a buhfaia pek ai chuan hmun tam takah Buhfai thawh lovin a pawisaa thawh an pung a ti a. Buhfaitham thawh tur chhungkaw tam tak an buai phah titih a, hmun tamtakah buhfaitham lak man tihto a ngai mai dawn te hi in en let nan hmang thar leh sela an duh tih a sawi.

Ration Buhfai hi Retailer te hnenah DCSO thuchhuahin Allotment Order hmanga Challan an tihfel hnuah Delivery Order (DO) hmangin Kudam (Go-Down) a la thin an ni a. Order a ruala an hmuh vek laia Buhfai semchhuah tur sawrkar Kudam-a a awm lo titih fo chu sawrkar inthlahdah vang a ni, a ti bawk.

MPYCC President chuan December ni 20, 2024 thleng hian thingtlangah leh Aizawl khawchhung hmun thenkhatah Ration buhfai an la lak loh thu an hria a. Kristian-te hunpui hman dawn laia mamawh ber Buhfai khamkhawp hmu lo an awm mai dawn emaw tih tur khawpa mipui an thlabar hman mai hi a pawi a. Kalphung thar sawrkar hian, Mizoram kalphung a tih danglam nasat lutuk avangin mi harsa zawkte tawrhna nasa takin a thleng mek zel a ni, a ti bawk.