Aizawl March 27, 2023 : MPCC President Lalsawta chuan vawiin khan Lunglei Municipal Council inthlan tur denchhenin Lunglei Press Club-ah thuthar thehdarhtute a kawm a, ram tana tih tur hria anih avangin zui tlak a nih thu a sawi a, Lunglei rulling MLA te chu bial mipui te thlavang pawh hauh ngam lovah a puh. Lunglei mipui inhlawhna tur Budget-a dah anga MNF-in an sawi chu dawt a tih sak bawk.

MPCC President chuan, "Ka kal tumna hi ka hria a, Mizoram mipui hruai ka tumna pawh ka hre bawk. Ka kal tumnaa kal tura tawn tlang ngai te chu Pathian leh Political will hmangin ka sutlang bawk ang. Zui tlak ka ni, a chhan chu ram tana tih tur ka hriat vang a ni. Pathian leh mipui puihnain kan sawrkar ngei ka ring," a ti. 

"Kan ram chhiatna leh dam lohna thiam taka sawi thinte hi thusawi thiam kan tihte an ni ta mai a, a damdawi an sawi ngai si lo. Kan ram damdawi chu sawrkar tha hi a ni. Pathianin mipui tha leh ram tha min pe a, midang beidawnna thlentu ni lova beiseina leh rinna petu nih hi Pathian min din dan a ni," a ti bawk. 

"Lunglei hian bial mipuite thlavang hauh ngam MLA a mamawh. Tuna ruling MLA te hi kan CM hian a seh dawn lo, mahse an hlau em em a, an hlauh chhan ka hre lo. Anmahni thlangtu mipui aia Chief Minister an hlau hi MLA tha leh huaisen an nih loh zia tichiangtu a ni. Thihna kotlanga chhim bial mipuite an awm a, RT-PCR an mamawhna pawh au pui ngam lo, bial mipuite leh Lunglei mipuite thlavang pawh hauh ngam lo khawpa an awm hi mak ka ti a ni. Kan sawrkar chuan tu pawh CM ni se la, kan ruling MLA-te chu an diknaah chuan an huaisen hle tur a ni," a ti bawk.

Lalsawta chuan, "Urban Employment Guarantee Scheme hi siam kan tum. MNF-in Lunglei mipui rethei zawkte inhlawhna tur Budget-ah kan dah vek tawh an tih hi thu dik lo a ni. 2023-2024 Budget Demand for Grants kha ngun takin en ula, hetiang pawisa hi dah a ni lo reng reng a ni. Politics hi duh tawka dawt sawi theihna tur emaw kan ti thin a; a ni lo. Engatinge Lunglei chungchang mai bakah Aizawl atanga Assam Rifle insawnchhuah tur chungchangah pawh kan ram hruaitute hian dawt an sawi reng thin le? Dawt hi thil tul lo a ni," a ti.

"Pawi ka tih em em chu, LMC inthlan vuakveta sum leh work order hmanga lei tur zawnga mi thenkhat an vak huai huai mai hi a ni. Hetianga lei theiha mipui min ngai tlat hi a vanduaithlak ka ti bawk. Kan ram a chhiat zel chuan tute pawhin kan tuar. Hawh u, sal leh nawhchizuar ang maia lei theihin i awm lo ang u. Baala hma a thingthi ngai lo, lei theih loh mi tam tak kan awm. Lei theih lohin i awm zel ang u," a ti bawk.