Guwahati:Kum 5 dana neih thin Global Adult Tobacco Survey (GATS) thar ber tihchhuah ah Mizoram chu vaihlo hmanah a tlahniam a, 67.2% (2009-2010: GATS 1) atangin 58.7% (2016-2017: GATS 2)-ah a tlahniam a ni. Zuk leh hmuam ti thin tlakhniamna hi point 8.5 niin tehna dangah pawh hmasawnna hmuh tur a awm deuh vek a, kum naupang lamah pawh a ching thar an tlem hret nia tarlan a ni bawk.Guwahati:Kum 5 dana neih thin Global Adult Tobacco Survey (GATS) thar ber tihchhuah ah Mizoram chu vaihlo hmanah a tlahniam a, 67.2% (2009-2010: GATS 1) atangin 58.7% (2016-2017: GATS 2)-ah a tlahniam a ni. Zuk leh hmuam ti thin tlakhniamna hi point 8.5 niin tehna dangah pawh hmasawnna hmuh tur a awm deuh vek a, kum naupang lamah pawh a ching thar an tlem hret nia tarlan a ni bawk. Zirtawpni kaltaa GATS 2 tlangzarhna Guwahati a neihin a tarlan danin Tripura chu zuk leh hmuam hluarna ber ni mekin GATS 1 ah 55.9% an nih laiin GATS 2 ah chuan 64.5% ah an chho a, Sikkim chu hmasawn ber ni thungin 41.6% atangin 17.9%-ah zuk leh hmuam a tlahniam bawk a, national average aiin a hniam a ni. Assam-ah chuan zuk leh hmuam hian hluar lam a pan thung a, 32.7% atangin 41.7% ah a pung thung a ni. Khaikhawmin Tripura leh Assam hi state tichhia an ni a, Arunachal Pradesh leh Manipur-ah hmasawnna sawi tham a awm lo va, Sikkim, Nagaland, Mizoram leh Meghalaya te chu chhinchhiah thama hmasawn state niin GATS 2 chuan a tarlang bawk a ni. Mizorama zuk leh hmuam ti zingah 25.1% chuan zial chauh an zu a, 24.3% chu hmuam lam tih ching an ni a, 9.2% chuan a zuk leh hmuam chi an ching kawp bawk a ni. Meizial zu zingah 54% chu mipa puitling niin 14.3% chu hmeichhhe puitling an ni a, hmuam chi ti zingah mipa 21.3% niin hmeichhia 52.4% an ni bawk. GATS 2-in a tarlan dan chuan meizial zuk hi 5.3 in a tlahniam a, hmuam lam ti chi hi 7.2 in a tla thla bawk a ni. Hetih lai hian kum 15-17 inkarah zuk leh hmuam chuan nep lam a pan bawk a, GATS 1-ah 35.4% a nih laiin GATS 2-ah chuan 27.0%-ah a hniam thla bawk a. Zuk leh hmuam chin tan kum (age of initiation) chu kum 17.4 atangin kum 17.8-ah a chho bawk a ni. Second hand smoke chungchangah Mizoram chuan hmasawnna hmu mah se hmarchhak state zingah a la sang pawl a ni a, chenna ina zial inzuk khum awm zat chu 95% atangin 84.1%-ah a tlahniam a, hnathawhna hmuna meizial khu-a inur pawh 64.6% atangin 44.5% ah a hniam bawk a ni. Hetiang bawk hian vantlang hmuna meizuk pawh 27.3% atangin 18.2%-ah a tla bawk. Cigarette atana mi 1 zelin thla khata sum a hman chu thil man to zel (inflation) nena chhut pawhin Rs 712.6 a ni mek a (GATS 1 Rs 1201.5), zoziala sum hman erawh pung deuhin Rs 256.1 a ni thung a, GATS 1-ah khan Rs 189.8 a ni thung a ni. Meizial nghei tum an pung nasa hle a, GATS 1-ah 16.7% a nih laiin GATS 2-ah chuan 53.5%-in a pung a, a hmuam chi ti zingah GATS 1 ah 25.8% a nih laiin GATS 2 ah chuan 71.2% nia tarlan a ni bawk a. Zial bawma a hlauhawmna tarlan an hmuh thin vangin 17.5% chuan nghei duhna an nei a, 2.5 point-in nghei duh an pung a, vaihlo hmuam chi-ah pictorial warning vang hian 6.3%-in sim duh an pung a, 26.0%-ah a ding mek a ni. Media lama vaihlo that lohna hmu thin chu 74.2% an tling bawk a ni. Global Adult Tobacco Survey 2 NE States Fact Sheets tlangzarhna hi Zirtawpni tlai 2:30 PM khan Assam Administrative Staff College, Guwahati ah neih niin NE state atangin palai an kal a, Mizoram atangin Mizoram State Tobacco Control Society atangin official 2 kalin chanchinibu mi 1 a tel bawk a ni.