Kum 5 dana neih thin Global Adult Tobacco Survey (GATS) tihchhuah thar berah chuan Mizoram chu vaihlo hmanah a tlahniam a, GATS neih hmasak 2009-2010 a Mizo mipui 67.2% ten zuk leh hmuam an ti nia chhut a nih laiin GATS II, 2016-2017 ah chuan 58.7% a ni ta a, thil lawmawm tak anih rualin ram changkang zawkte nena khaikhin chuan la sang tak a ni. Zuk leh hmuam chungchang hian ngaih pawimawh a hlawh chho zel a, sum tam tak min hmantirtu a nih mai piah lamah taksa hriselna nasa takin a nghawng tih hmuhchhuah a nih chhoh tak zel avang a ni ber a. Hei mai bakah mipui vantlang hmuha tih a zahthlak chho zel bawk a, mipui hmaa ding thin te tan phei chuan tih loh hi a tha ber ani tih kan hre chho ta zelte hi hmasawnna nasa tak a ni. Mizoram sawrkar pawhin mipuiten zuk leh hmuam an ti nasa lutuk hi a ngaimawh hle a, puitling ah chuan hmalak chak a harsat tawh avangin la ching thar lo zirlaite zuk leh hmuam laka humhim an nih theihnan NEDP hnuaiah Project Himna-MADAT (Mizoram Against Drugs, Alcolhol and Tobacco) tih thupui hmangin hma a la mek a, a bultan nan Aizawl district chu hman a niin district dangah te pawh la chhunzawm zel tum a ni. Project Himna-MADAT hnuaiah hian Middle school 50 thlanchhuah bikah te zirchianna neih a ni a, an zirchianna atanga a lan danin zuk leh hmuam ti zirlai tam ber 86% deuh thaw chu an chhungte zuk leh hmuam engemaw ber ti thin an ni tih hmuhchhuah a ni. He zirchianna atanga thil langchiang tak mai chu thangthar zawkte hian zuk leh hmuam hi an nu leh pa te atangin an zir/ching tan a ni tih hi a ni. Nu leh pa ten fate chu zuk leh hmuam laka fihlim vek turin an beisei ngei ang a, mahse hetih lai hian a zirtirtu ber ten an tih tlat avangin awmzi a nei lo tihna a ni.Tun kan dinhmunah hi chuan ‘Chakai nufa kal inzirtir’ an sawi hi kan ang hle mai. Zuk leh hmuam laka naupang zawkte venhim an nih theihnan chhungkua, khawtlang, school leh kohhran ten nasa lehzual zawka tan an lak a tul ta hle mai. School zirtirtute hi naupangte entawn an ni a; mahse, hetih laia mei zu khu luih luih mai leh zu rui an hmuhte hian a tha lo zawngin nghawng thui tak naupang te-ah a nei a. Kohhran hruaitu zingah pawh tan lak a ngai hle mai. Mizoramah hi Kristian ram kan nih angin kohhran hruaitute thusawi hi kan awih a, chuvangin tun aia nasa hian kohhran hi tan han la lehzual se, zirlaite hi zuk leh hmuam laka kan venhim theih lehzual a beiseiawm e.