Pathianni hmasa (March 10,2019) tlaiah khan inthlanpui neih hun tur puan a ni a. MP (Lok Sabha) ah Mizoramin seat khat kan nei ve a, MP pakhat chauh thlang thin kan nih avang hian MLA inthlan aiin kan ngai neu zawk ni pawhin a lang. Kan ngaih ropui zawk miau avangin keini chuan MLA election hi inthlanpui/general election kan tih mai thin laiin vairam lamah chuan MP(LS) inthlan hi inthlanpui/general election an ti thin.
Inthlanpui hi a hautak thin em a, sum leh pai tam tak hman a ni a, sorkar hna kal lai tam tak a chawl thuap a ngai a, vai ram lamah phei chuan tharum thawhna leh thihna hial a thlen thin avangin inthlan boruak sosang hi liam thuai se, sorkar thar piang thuai se tih hi an duh dan a ni a. Election commission pawh hian a hun tur hi inthlan dawn hnai takah a puang thin a, kumin pawh hian India ram pumah inthlan chhawng (phases) 7 a awm dawn a. A hmasa bera inthlang tur (April 11 a inthlang tur) state zingah kan tel a, a hnuhnung ber hi May 19-ah an inthlang anga. May 23, 2019-ah vote hi a ruala chhiar tur a ni ang.
Mizoram hian UT kan nih hnu 1972 atangin Lok Sabha MP seat khat kan nei ve a, kan MP hmasa ber chu Pu Sangliana (Mizo Union) a ni. Kan MP seat hi Scheduled Tribe tana hauh a ni nghe nghe. UT kan nih tirh atanga vawiin thleng hian MP pasarih kan nei tawh a. Kan MP (LS) inthlan history han chhui let hian ngaihnawm tak tak a awm nual mai. MP kan neih hmasak ber kha Mizo Union party a ni a, a hnuah an party hi congress-ah an inchhun luh tak avangin a ral zui a. UT kan nih atangin PC party hian MP pakhat an nei tawh a, an vanglai tak khan Dr. Rothuama thlan tlin a ni, a hnuah amah tho hi independent-in thlan leh a ni nghe nghe. Congress party hian UT kan nih atanga MP inthlan vawi 12 kan neih ve tawhah hian hnehna vawi 6 an chang tawh a, MP pawh pathum an nei tawh a, Dr. C.Silvera phei chu union minister a ni tawh nghe nghe.
MNF hian MP inthlan tum khatah hnehna an chang ve tawh a (an thlawp independent MP vawi khat a tling tawh bawk), independent-a ding MP a tling pathum an awm tawh bawk. Dr. C.Silvera kha MP inthlan vawi thumah a tling zawn a, Dr. Rothuama leh Pu Vanlalzawma leh tuna MP ni lai Pu C.L.Ruala te hi vawi hnih theuh an tling tawh bawk. Dr. Silvera hi Mizoram MP inthlana record nei tha ber a ni awm e, vawi thum a zawnin a tlin bakah politician langsar a hneh nual a, chung zingah party president ni thei thah - Pu Zoramthanga te, Pu Lalduhawma te, Brig. Thenphunga Sailo te an tel.
Kum 1998 MP inthlanah khan independent candididate Dr. H.Lallungmuana thlan tlin a ni nawlh mai a. Ani hi politics rawngkai pawl din Citizens’ Common Front candidate a ni a, party tenau pahnih MPC leh MNF(N) ten an thlawp bawk. Congress sorkar hun term tawp lam, mipuiin sorkar lai an nin tawh lam a ni a, politics-a hmel thar leh kalphung thar an duh vangin Dr. H.Lallungmuana boruak hi a lian chak hle a, amah thusawi thiam tak, kohhran rawngbawltu leh college zirtirtu, mi hmingtha tak a lo ni bawk a. A tling ta mai a ni ber. Ani hian parliament-ah ding chhuakin Mizoram chungchanga sawi a, kan MP dangte zingah pawh hian thusawi an awm ve tho mai thei e.
Mizoram political history-ah hian party lian inbei tawk tak pahnih aia tam an awm ngai lo a, a lian pahnih inbeihna karah a tenau dang erawh an awm nual thin. District Council hun laiin Mizo union leh Zalen pawl an inter tawk viau a. UT kan nih hnuah PC leh INC an inbei chho tawk leh viau a. PC party an tlak hniam hnuah state kan lo ni a, MNF an insawh nghet chho a, tun thlengin MNF leh INC hi party lian inbei tawk ber an ni zui ta a ni. Tun tum kan inthlan turah pawh hian MNF candidate leh INC thlawp independent candidate-te hi inbei nasa ber tura ngaih an ni. INC hian candidate nei lo a independent candidate thlawp an nei fo tawh a. Mahni party bil candidate neih loh hi party tlakhniam zia entirna a tih theih rualin party/pawl tenau zawkte nena thawhho hian a hlawkna pawh a awm tho. MNF pawh hian 1999 inthlan a party dang nena an intawm MP kha a hnuah an chang ta daih a nih hi.
Mizorama MP kan thlan ve tawh zingah rorel lai party candidate tlin zawh loh hi tum hnih emaw a awm tawh a, independent candidate an hneh lo ve ve. Kum 1980 inthlanah khan MP ni lai Dr. Rothuama (PC party) chu independent-in a ding leh a, sorkar lai PC party candidate a hneh a ni. Sawi tawh angin state kan nih hnuah kum 1998 khan Dr. H. Lallungmuana, independent candidate a lo tling tawh bawk. Tuna kan inthlan turah pawh hian rorel lai MNF hneh tumin eptu party-te an inthurual a, an thlawp tlan tur independent candidate an zawng kual a, lungrual takin Pu Lalnghinglova Hmar an thlang ta a ni.
Tun tum MP inthlan lo awm turah hian candidate tur pathum kan hre tawh a. Independent a ding tur pahnih an awm a - Pu Lalhriatrenga Chhangte leh Pu Lalnghinglova Hmar te hi. Pu Hriata Chhangte hian party behchhan a nei rih lo a, Pu Lalnghinglova Hmar hi chu ZPM (Exodus Movement, MPC leh ZNP) leh INC in an thlawp a An thlawp mai ni loin an candidate a ni mah zawk. MNF hian Pu C.Lalrosanga an candidate dawn bawk. An pathum hian political party a la tel ngai lo, neutral kan tih ang chi vek an ni. Anmahni pawh hian politician an nih loh thu te, politics a zuan luhna remchang an hmuh pawha an luh duh lo thin thu te an sawi thin.
Party-ten politician ni lo candidate an zawng mai hian ngaihtuah a tithui ang reng. Kan political party-te hian an party aiawha ding tur politician an nei lo tihna a ni thei ang em? Mipui awh tur chi mi hmingtha, neutral pawhin an vote theih tur mihring hi politician zingah hian an lo awm reng reng tihna a ni thei. Chawhma pawh politics-a la inchiah reng reng lo te hian an tui lohna kawng an zawh dawn chu a ni a, an rin ai ngawt chuan har an la ti viau mai thei a ni.
Party huang pawna mi candidate an ngai ta mai hi kan politician-te tan chona nasa tak a ni. Bial khata ding tawk politician chu kan ngah a ni maithei a, Mizoram pum huapa ding tlak leh zawrh tlak erawh an lo vang hle a lo ni. Party tinah hian thalai fel tak tak an awm a, anni hi hruaitu tlak, mipui a zawrhtlak a chher chhuah a hun. Hruaitu nih rei tawh vang te, party a lo awm rei tawh vang te, party president lam tang nih tlat vang te, pute tlawn thiam vang te a chanvo tha inpek ngawt hi political party te hian an la tuar dawn. Tunah pawh party-ho hi an president thlak thei tur hruaitu lawk leh awm ang deuh lurh nei an awm miah loh hi.
Politician pakhatin ‘politician niloin politics an khel a,’ ti a, a dem zawnga a sawi kha ‘a leha linga vultui thlawr ber’ ang maiin tunah chuan anmahni politician-te hian politician ni lo politics khel tur leh Delhi tlanga an aiawha ding tur an zawng ta thung a nih hi. Lehlamah chuan politics tuinu a la inchiah ve miah lo MP kan nei leh tur hi a lawmawm viau thei, rilru ngil leh dik tak puin, party politics chim buai phak loha Mizoram tana thawk mawlh mawlh tur a nih hlauh phei chuan a vanneihthlak viau ang.