India ramin a buaipui mek, a bik takin sorkar tharin a ngaihmawh em em 'Black Money' hi thenkhat chuan kan hre chiang viauin a rinawm a, tun tum chu a la hre chiang vak lo te tan bik han sawi zau ila a tha awm e. Bul deuh hlek atangin han sawi kual ta ila. Chhiah chi hrang hrang tlingkhawm hi sorkar sum hnar pawimawh ber a ni a. Mimal sum lak luh leh hlawh atanga chhiah a lak 'income tax' an tih te, company ho hnen atanga a lak 'corporate tax' te bakah bungraw lei (leh hralh) atanga lak sales tax/VAT te hi sorkar chhiah lak langsar pawl a ni a. Tichuan black money an tih tak chu mawlmang te a sawi dawn chuan sorkar account a lang lo leh chhiah awl rukna atana miin pawisa an thuhruk hi a ni a. Sorkar hriat loha chheprelh, chhiah lak ve lohna sum tihna a ni a, chungte chu hlemhletna (corruption) atanga hmuh a nih avangin chhui chhuah a har em em a, a neituten mi hriat loh turin an thukru a, ram dang bank-ah te an dah thin a. Switzerland a bank-te khu chutiang sum dah nan chuan an hmang nasa hle a ni. Pawisa fai a kawl ru tam tak an awm laiin thenkhat chuan in leh lo leina atan black money hi hmangin real estate (In leh lo, ram hralhna leh leina buaipuitu) ah an chheprelh nasa hle a, hming dang invuahin ram lei ching viau bawk. Black money hi engtiang taka hluar leh eng zat fakau a nasa nge a nih tih hi chhui chhuah mai a har hle a, economist-ho chhut dan pawh a inang lo fur bawk. Chutihlaiin, India ramah hian black income hi a hluar tial tial a, a pung deuh deuh, tih erawh an pawm tlang thung. Mi thenkhat chhut dan chuan tun dinhmunah hian India mite sum chheprelh (Black money) hi Cheng vaibelchhe nuai 25 (Rs 25 lakh crore) a tling hial a ni. Mithiam pakhat (Raja J.Chelliah) phei chuan black money hi kumtina India ram sum thawhchhuah zawng zawng (GDP) za zela 20 tling thin niin a chhut a. Ram changkang kan tihte aiin hei hi a sang fe zawk a ni. Global Financial Integrity chhut dan chuan dan lo a ram danga sum dah tam ram 10 zingah India hi a tel mek bawk. Hman atang tawhin sorkar laipui hian black economy hi a vei tawh a, black money tibo tur leh pawisa chheprelh haichhuak tur hian hma pawh a la nasa thin a. Chuti chung chuan a pung tial tial thung. Black money a pung tial tial a nih chuan sorkarin a pawisa hmuh tur a chan tam tial tial tihna a ni a. Tunhma chuan pawisa chheprelhtute hnenah an pawisa thuhruk sorkar hnena hlan turin an ngen a, dan an lo bawhchhiatna ngaihdam an nih tur thu hrilhin an thlem thin a, chutiang chu 'voluntary disclosure scheme' (VDS) an ti nghe nghe. A chang chuan, black economy venna atan pawisa thenkhat thuhruk awl deuh tur Rs 1000 (note) te hi an titawp thin bawk. (Kum 1946 & 1978). Black money-in economy a nghawng dan hi sawi tur a tam hle a. A hmasa berah chuan black money a tam chuan corruption a hluar tihna a ni. Chubakah chuan, sorkarin ram sum leh pai dinhmun (Economy) a chhutin black money hi chhut tel a ni ngai lo a, chhut tel ngawt theih pawh a ni lo reng a, chuti a nih chuan economy dinhmun tarlan thin hi a dik tawk lo tihna a ni. Black money tam tak vangin economy dinhmun dik tak kan hre thei lo a nih chuan sorkar policy tam tak a nghawng tel dawn tihna a ni. Data dik lo a tam chuan ram hmasawnna tura ruahmanna (Plan, policy leh development programme) tam tak hi a dik tawk lo tihna a ni leh zel ang. A nghawng pawi tak pakhat chu sorkarin a sum hmuh tur zat a hmu pha lo hi a ni. Chhiah lak tur tam tak an lo thukru vangin sorkarin sum tam tak a chan phah tihna a ni. Black money hi sorkar hmalakna tur sum bo thlau leh tihchingpen a ni a, a hmanna tura hman a nih tak loh avangin mi tam takin an chanpual tur an chan loh phah a. Sum leh pai chungchanga sorkar ruahmanna leh hmalakna 'Monetary policy' a nghawng nasa viau bawk. Mizoram hi eng nge kan dinhmun ni ve le? Mizoramah hian direct tax lak hi a tam lem lo a. Direct tax an tih chu chhiah chawituin a phurrit a phur nghal a, mi dang hnena hlan chhawn theih a ni lo (E.g, income tax). Chutihlaiin, indirect tax an tih chu VAT leh sales tax ang chi, a phurrit mi dang hnena hlan chhawn theih chhiah petu (dawrkai) ni loin (a leituten) an chawi ve theih ang chi hi a ni. Dawra thil kan lei hian dawrkaiten chhiah (VAT) an lo pe daih tawh a, mahse, kan thil leina manah khan an chhiah pek chu an chhut tel avangin a leituin chhiah kan pek kep tihna a ni a, chhiah phurrit chu a petu ni lo mi dangin an phur tel a nih chu. Black money hi a tlangpuiin direct tax awlruk hi a ni a, sorkara chhung lut lo a chheprelh daih hi a ni. Sawi tawh ang khan Mizo mipuite hian income tax kan la chawi meuh lo a, thilsiamna leh sumdawnna lian tham (company/industry) a awm loh avangin chhiah awl ruk hi India ram hmun dang ngaihtuahin a tam lem lo ang. Mahse, kan rama contract hna rawn thawk leh supplier hnam dangte hian chhiah an awl duh vangin fing takin Mizoramah bill an la thin an ti a, tak tak a nih chuan chhiah awlrukna sum thahnem tak kan ramah pawh a awm tihna a ni ang. Zau zawka black money an sawifiahnaah chuan a ruka chheprel leh sorkar hriat loha sum insiam chawp (illegal and unaccounted money) hrim hrim hi an huamtir a. Chuti a nih chuan sorkar hmalakna hrang hrang - kawngpui siam, lo neih tihhmasawnna tur te, thingtlang mite hmasawnna tur te, leh thil dang a sum hman dik loh leh eiruk sum tlingkhawm thahnem takte pawh hi a huam tel tihna a ni a. Sorkar laipui leh hmun dang atanga sum tam tak lo lut thin kawng bo ta te, contract hna phuailuai taka thawh a sum tam tak hlep ruk te, eirukna sum zozai te hi chhut ta ngat ila a tam khawp ang. Tunhnai a lar em em a ruka damdawi tawlh atanga mi thenkhatin sum an hai luhte hi black money a ni. Mizoram pawn atangin a rukin an la lut a, a ruk bawkin Mizoram pawnah an thawn chhuak leh thin a, chhiah awl ruka sum hai luhna dik tak a ni awm e. Chutiang zelin dan phal loh a sumdawnna chi hrang hrang - rangkachak, lunghlu leh thil danga sumdawng ru, sorkara chhiah pe lut lo an awm nual bawk ang. Eiruk chingte zingah hian pawisa faia kawl an awm teuh rualin real estate a sum chheprelh leh hmun danga a ruka thuhruk ching pawh tam tak a awmin a rinawm. Chiahpuam a sum che vel tam zia te, real estate pakhat lo lian thut tawp leh ta daih te, hman deuh a bank lem hrang hrang rei lo te a zuzi leh ta te kha kan la hre awm e, khang atang ngawt pawh khan Mizoramah hian dik lo taka sum lak luh leh chheprelh a tam turzia a lang thei a ni. A tawpna atan chuan kut tling lo a sum lak luh a, sorkar hriat loh a chheprelh hi khua leh tui thate tih tur a ni lo tih hi i hre thar leh ang u.