ZALEN, July 14, 2026: Sihphir Town Billiards Association chuan a vawi hnih nan ram pum huap inelna an buatsaih leh mek a, Manuna Memorial Mizoram 10 Ball Pool Championship-ah Mizo player tha an tel kim hle.

Tel turin cue player 84-in hming an pe lut a, Mizoram pool tournament lian tak hi Sihphir leh Sihphir Venghlunah tun kar chhungin Inrinni thleng khelh a ni dawn a, a vaiin lawmman pawisa fai Rs. 1,00,000 sem chhuah a ni ang.

Pool hrang pariatah player-te then hrangin Thawhtanniah championship tan a ni a, a tir ni li chhung pool league khelin pool tin atangin mi pahnih theuhin round of 16 an lut dawn a, Inrinniah final a ni dawn a ni.

Nikum khan Sihphir Town Billiards Association chuan hlawhtling takin CK Hyundai 9 ball pool championship an buatsaih tawh a, final-ah T Laltlansanga’n Zothantluanga a hneh a, kum zawna champion tumin Lunglei ball hawlh thiam, Tlansanga a inlan dawn.

Zothan Autoworks (Tata), MST Motors (Ather) & MSS Motors (Ultraviolette) neitu pa, Tluangtea’n kum kal taa hun chhinchhiahtlak tak a hman tawh aia thaa khelh a tum bawk a. Nikuma final lutte pahnih bakah Mizo player tha - Lalrina Renthlei leh Lalsangzela an tel dawn a, anni pahnih hi Mizoram Snooker & Billiards Association-in championship a buatsaih hnuhnun vawi hnihah final lut ve vein tum khat ve ve an chak a ni.