ZALEN, Sept. 24, 2026: Lalhmingpuia’n boxing tha pangngai tak lantirin Samuel Lalremruata a hneh a, Nilaini zan Mizoram Labour Link LPS Pro Fight inhnek dangah awlsam takin Michael Zosangliana leh Stephen Lalrindika an chak bawk.

LPS Arena, Falkland-ah a tir atanga a tawp thlengin nung takin welterweight huangah ITI Veng tlangval Remruata nen an inhnek a, Hmingpuia’n thiamna a hmang hnemin a hnek chhuak tam zawk a, unanimous decision-in a chak.

Chhiahtlang boxer hi a inlan vawi khatna niin Orient Goldsmith Fighter of the Night-a thlan a ni a, Thawhlehni zanah Lalchhanchhuaha, Khawzawl Electric Veng nen round of 16 luh inchuhin an inhmachhawn zui ang.

Kum 20 mi, Hmingpuia’n nghet tha takin a khel a, a tirah chiang taka a hnek fuh zawn hnuah Remruata’n bei letin hmuhnawm takin an innuai a, Chhiahtlang tlangvalin hnek dan chi hrang hmang tam zawkin a hnek chhuak hnem zawk a, inhnaih chilhah a kut a rangin a dik zawk bawk.

Round hmasa pahnihah ITI Veng boxer Remruata’n bei let tha viau mah se round thumna tawp lamah tla hniamin a hnek let hneh lo a, 30-27, 30-27, 29-28-in Hmingpuia a chak.

Welter-ah tho a inhnekpui tur, Cleason Lalrawngbawla, North Vanlaiphai a inlan loh avangin awlsam takin Lalduhawma, Lengpui Vengthar a chak a, Thawhlehni zanah Lalrinmawia, Ramthar North nen round of 16 luh inchuhin an intawng zui ang.

Fly-ah inthlifim chho zelin Sialhawk rawlthar, Sangliana’n round khatnaah technical knockout-in Tommy, Bungkawn a hneh a, inhnek an tan rualin a nuai nghal a, a lu leh a taksaah hnek zawnsakin Tommy-a a tlu a, bei zui tawh lovin minute khat leh second 51-ah inhnek tihtawp a ni.

TD Academy-a inzir lai, Sangliana hian round of 16 lut turin David Vanbiakthawnga, Nghalchawm a hneh leh a ngai dawn a ni.

Inhnek dangah Khatla East rawlthar, Benjamin Lalthantluanga’n split decision-in Lalthazuala, North Chawnpui a hneh hram a, tharum leh thahrui nei Thazuala’n na taka hnek tumin pan tluan mah se inven paha tawlh kual chungin Thantluanga’n awmze neiin vawi hnih khat a lo hnek thin a, judge pahnih point pekah chakin pakhatin North Chawnpui rawlthar Thazuala a chaktir ve thung.

Thingsulthliah boxer PC Laldinthara’n Lalnunthlanga, Thingpuikuol, Manipur lakah inhnek a thunun ve thung a, hnek thiam zawk a nihna chhawrin round tin la vekin unanimous decision-in a chak.

Light-ah Ramrikawn Tanhril rawlthar, Stephen Lalrindika’n round hmasa berah technical knockout-in Vanlalhriata, Bawngkawn a hneh a, Rindika hian rang takin a hnek tlu nghal a, Hriata tho leh mah se nawr zuiin minute khat leh second 19 chiah an inbei hman tihin referee Malsawmtluanga’n a titawp.

Inhnek dangah thiamna nei sang lo ve ve, Auckchin Maung leh Vanlalmalsawmdawngliana an inhmachhawn a, a tir round hnihah Saitlaw tlangval, Dawngliana’n hnek tha zawk mah se round thumnaah talbuaiin a chau hle a, thahrui nei fei zawk, Auckchin chuan panin a hnek hnuah lehlamin a lo kuah zel avangin referee Malsawmtluanga’n a kuah zel avangin Saitlaw boxer point a paihsak a, hei hi tuar zuiin a tawp lama che tha Sate, Myanmar boxer chuan split decision-in hnehna a chan phah a ni.

Bantam-ah North East Khawdungsei boxer Vanlalvohbika’n round thum la vekin Lalhlimpuia, Tuingo, Myanmar a hneh a. Ratu tlangval, Denis Vanlalsiama’n Malsawmtluanga, Bawngkawn lakah round hnih lain a dinhmun a siam bawk a, Bualpui NG boxer Lalremruata Fanchun chuan Lalrohlua, Sairang lakah inhnek awpbet ve thungin judge pathum point pekah 30-27 vekin a chak a, hnehna chang boxer pathum hian round of 16 lut turin vawi khat theuh chak an la mamawh a ni.

Inhnek hnuhnung ber middle-ah Vaivakawn tlangval, Isak Lalduhsaka’n round hmasa ber leh hnuhnung berah a dinhmun siamin unanimous decision-in HD Lalrozama, Zonuam a hneh a, round of 16 lutin October 2-ah welterweight champion ni tawh, Mission Veng boxer Lalruatzela Hauzel nen quarterfinal luh inchuhin an intawng dawn a ni.

Mizoram Labour Link LPS Pro Fight 2026

Zan 13-na : September 23, 2026 (Nilaini) @ LPS Arena, Falkland

RESULT

FLYWEIGHT

Michael Zosangliana (Sialhawk) def Tommy (Bungkawn)

= Technical Knockout (Round 1, Minute 1:51)

Benjamin Lalthantluanga (Khatla East) def Lalthazuala (North Chawnpui)

= Split Decision (27-30, 30-27, 30-27)

PC Laldinthara (Thingsulthliah) def Lalnunthlanga (Thingpuikuol, Manipur)

= Unanimous Decision (30-27, 30-27, 30-27)

BANTAMWEIGHT

Vanlalvohbika (North East Khawdungsei) def Lalhlimpuia (Tuingo, Myanmar)

= Unanimous Decision (30-27, 30-27, 30-27)

Denis Vanlalsiama (Ratu) def Malsawmtluanga (Bawngkawn)

= Unanimous Decision (29-28, 29-28, 29-28)

Lalremruata Fanchun (Bualpui NG) def Lalrohlua (Sairang)

= Unanimous Decision (30-27, 30-27, 30-27)

LIGHTWEIGHT

Auckchin Maung (Sate, Chin State, Myanmar) def Vanlalmalsawmdawngliana (Saitlaw)

= Split Decision (28-29, 28-27, 29-28)

Stephen Lalrindika (Ramrikawn Tanhril) def Vanlalhriata (Bawngkawn)

= Technical Knockout (Round 1, Minute 1:19)

WELTERWEIGHT

Lalhmingpuia (Chhiahtlang) def Samuel Lalremruata (ITI Veng)

= Unanimous Decision (30-27, 30-27, 29-28)

Lalduhawma (Lengpui Vengthar) def Cleason Lalrawngbawla (North Vanlaiphai)

= Walk Over

MIDDLE WEIGHT

Isak Lalduhsaka (Vaivakawn) def HD Lalrozama (Zonuam)

= Unanimous Decision (29-28, 29-28, 29-28)

Orient Goldsmith Fighter of the Night

- Lalhmingpuia (Chhiahtlang)

Zan 14-na : September 24, 2026 (Ningani) - 8:00 PM

FIXTURE

FLYWEIGHT

B148 Lalzuimawia (Champhai Zotlang) v Benjamin Lalrindika (Selesih)

B149 Seigoulal (Churachandpur, Manipur) v Alfred Lalrinsiama (Rangvamual)

B150 Moses Lawmkimthanga (Nghalchawm) v Lalhriatzela (Maubawk)

BANTAMWEIGHT

B151 Thang Biak Dik (Lamka, Manipur) v Lorry Vanlalduatpuia (Sangau)

B152 C Lalhriatpuia (Mission Vengthlang) v Lalchhuanawma (West Lungdar)

B153 VL Malsawmzuala (Maubawk) v Vanlallawma (Rangvamual)

LIGHTWEIGHT

B154 Israel Thangliana (R Vanhne) v Joseph Lalchawimawia (Saron Veng)

B155 Thangboi (Churachandpur, Manipur) v LV Robert Lalengliana (Tuipui Ferry)

WELTERWEIGHT

B156 Ricky Malsawmzela (Dinthar) v C Lalrinhlua (Sairang Sihhmui)

B157 Tyson Vanlalhruaimawia (ITI Veng) v John Lalhunlawma (Phainuam)

MIDDLE WEIGHT - ROUND OF 16

B158 C Lalhruaitluanga (Chawngtlai) v Vanlalsanga (Suangpuilawn)