ZALEN September 30, 2026: District Prison & Correctional Home, Serchhip tia a hming an thlak tak, Serchhip District Jail tih thin, Chhiahtlang dai a mi chu vawiin khan Juvenile Justice Board te chuan an endik a, tang zinga a chanve dawn chu ruk ruk thubuai nei an ni. 

District Prison & Correctional Home, Serchhip ah hian Jail tang mi 94 an awm mek a, an zinga mi 87 hi mipa niin mi 8 chu hmeichhia an ni. Ruk ruk vanga Jail tang an tam ber a, mi 43 niin an zingah hian hmeichhia pakhat a tel. ND&PS Act vanga tang mi 17 awmin MLP Act vanga tang mi 16 an awm mek a, kum tlinglo pawngsual (POCSO) vanga tang mi 9 leh chhan dang vanga tang mi 9 an awm mek a ni.

Jail Inspection Team te hian Jail tang te ei tur Artui leh thlai chin tur chi an kensak a, District Hospital Serchhip atangin Doctor 2 leh Psychiatrict 2 ten tlawhin Jail tang te hi Free Medical Clinic & Mental Health Awarness an neihpui a, naktuk October 1, 2026 hian Family Guidance & Counselling Center (FG&CC), Serchhip atangin Counselling mamawh leh rawn duh tan ruahmanna siam a ni bawk.

Jail Inspection Team te hian Jail thuneitute leh Jail tang te chu kawmin an harsatna te an zawt a, anni hian Jail-a Duty tur Doctor chu sawiloh Nurse Duty tur pawh an neih loh avanga harsatna an tawh thin thu lo sawiin thuneitute hnena an thlen pawhin awmzia a awm theih loh thu leh an beidawn hial tawh thu an sawi. August 5, 2025 atang khan Serchhip District Jail a thawk thin Staff Nurse chu Aizawl ah sawn a ni a, khata tang khan Staff Nurse hi vawiin thlengin an la nei leh tawh lo a ni.

Inspection Team te hi Josangzeli Principal Magistrate JJB in a hova, Lalhmingsanga Ralte, Member JJB; Jane Zodingliani, Member JJB; Saidingpuia Sailo. Legal Cum Probation Officer DCPU, Serchhip; Lalrinhlua, Legal Aid Councel JJB; PC Vanlalluna President, Sub-Hqrs. YMA Serchhip leh Kapliana Pachuau President, Serchhip District MJA ten an tawiawm a ni.