Tun hnaiah Mizo film industry nasa takin a thang chho a, film chhuakte pawh tha tak tak hmuh tur a aw chho nawk. Hetiang karah hian bawh lam bawh huk zel mai Mizo thalaite hian film siam kan intihhmuh leh lutuk ang a, en tlak mang loh kan siam teuh ang tih a hlauhawm hle - 1999 film erawh chutiang a ni dawn lo. 

Mizoten film lama mithiam kan neih tlemte zinga mi Raymond Colney film siam '1999' hi June 8, 2024 khian Vanapa Hall-ah tlangzarh a ni dawn a, inbuatsaihna pawh ngawrh taka kalpui chhoh mek a ni. He film-ah hian lemchan lama tawnhriat nei tha tak tak inlan an awm nual a, Mizo Film Award-a Best Actor leh Best Actress te pawh kan hmu dawn. Mizo Film Award 2021-ah khan Papuia Pachuau leh Rspi ten he chawimawina hi an dawng a, an ni pahnih hi '1999' film-ah hian kan hmu dawn a ni. 

Anni bakah hian zaithiam Mary Dawngi, Miss Mizoram tanga kan hmelhriat Baby Zomunpuii leh midang eng emaw zat inlan tur an awm - a danglamna ber tur erawh a thawhthu (a story) a ni. A genre pawh - black comedy, christian mystery a ni ang. 

A thawnthu chu le...

Lalparmawii chu mumang mak tak maiin zing dar 3-ah a kaitho ziah mai a, hun lo la awm tura a fanu Lalnunengi dinhmun nen inkungkaihna lian tak neia a rin avangin en nawn fo theih turin a hnutchhiat ta. Lalnunengi chuan a puitlin hnu thlengin hrethiam tak tak lo mah se, nu hmangaihna chuan lang lo phenah rauthla talin a fanu tan kawng a lo sialsak a ni a. Hringnuna duhthlanna kan siamin kan hma hun a nghawng nasat theih zia tarlanna film a ni.

A changtute

Lemchan lama tawn hriat nei tha - Zoparmawii, Papuia Pachuau, Gilbert Colney, Rosangpuii Ralte leh Maruata Rawite te kan hmu dawn. Anni bakah hian - Eddie Tochhawng, Zirsangpuii, Aman Shahi, H. Lalremsangi, Saii Sailo leh Anchal Chhetri te an inlan bawk.

1999 hi June 8 zan khian Vanapa Hall-ah Theatre Release neih a ni dawn a, film enho bak programme dang engmah zeh tel ni dawn lo. Lersia Play-ah entheiha dah tur a ni a, a vawikhat nan online-a lei theih mai piah lamah Lersia Play-a entheihna hi ticket a zawrh chhuah tum a ni a, kohhran, YMA leh pawl hrang hrang tan inhlawh nan a hman theih dawn a ni.