Aizawl; Kum 2009 atanga kumin, 2022 inkar chhungin chief minister leh minister-te lirthei (car) leina atan Rs. 9,04,75,715 sen a ni tawh a. Kum 2009, 2019 leh 2022-ah chief minister hman tur lirthei lei a ni a, minister-te lirthei chu kum 2009, 2014 leh kum 2019-ah te a thara thlak a ni.

RTI Act hmanga zawhna, General Administration Department (GAD), Secretariat Administration Wing (SAW)-a SPIO-in a chhan danin, CM, Dy. CM leh minister te hman tur lirthei leitu chu GAD-a Secretariat Administration Wing niin, kum 2019-2022 chhungin CM, Deputy CM leh minister 10-te hman tur lirthei thar lei a ni a, CM hman tur chu Rs. 25,56,000 man Jeep Compass Limited (4X4) leh Rs. 24,23,901 man Jeep Compass Limited (O) 2.0D MT lei a ni.

Deputy CM leh minister dangte hman tur chu a inangtlang lei niin, Verna 1.6 L VTVT SX ‘O’ leh Scorpio S11 4WD lei a ni a, Rs. 12,37,451 man Duster 110PS RXZ pakhat lei tel a ni.

Verna 11 leina atan Rs. 1,31,66,769 sen a ni a, pakhat Rs. 11,96,223 man chi pali leh Rs. 11,97,411 man chi pasarih lei a ni a. Scorpio 11 leina atan Rs. 1,84,69,770 sen a ni.

Kum 2019-22 chhunga CM leh minister-te lirthei leina atana sum sen zawng zawng chu Rs. 3,78,53,891 a tling. 

MLA-te zinga lirthei lei ve lo an awm leh awm loh zawhna chu SPIO chuan SAW hnuaiah council of ministers te official car leh support car chauh lei a nih thuin a chhang a, CM leh minister-te lirthei chu a thara thlak a nihin an lirthei hmasate chu secretary leh senior officer-te hmantir an ni ve leh thin tih SPIO chuan a tar lang bawk.

2019-22: CM leh minister-te car lei dan

Lirthei (model)                                        A man zat
Jeep Compass Limited (4X4)                - Rs. 25,56,000
Jeep Compass Limited (0) 2.0D MT     - Rs. 24,23,901
Verna 4 Nos @ Rs. 11,96,223               - Rs. 47,84,892
Verna 7 Nos @ Rs. 11,97,411               - Rs. 83,81,877
Scorpio 11 Nos @ Rs. 16,79,070          - Rs. 1,84,69,770
Duster 1 Nos @ Rs. 12,37,451             - Rs. 12,37,451
TOTAL                                                  - Rs. 3,78,53,891