Aizawl: Kum 2020 chhunga Doctor ten Mizorama thihna thleng an chhinchhiah zingah thisen zam kaihhnawih tha lo vanga thi an tam ber a, he natna vanga thi hi 17.5% an tling a ni.

Economics & Statistics Department in kum 2020 chhunga damdawi in hrang hranga mitthi 3318 te an thihchhan an zirchianna ah thisen zam kaihhnawih tha lo vanga thi hi an tam ber a, chhinchhiah danin he natna avang hian mi 579 an thi a, hei hi damdawi ina thi zawng zawng atanga chhutin 17.5% a tling a ni.

Thisen zam tha lo kaihhnawih (disease of circulatory system) hian thisen sang vanga thi, lung tha lo leh thildang vanga thi te a huam.

Chhinchhiahna atanga a lan danin pum leh ril tha lo (digestive system) chu 2-na niin he natna avang hian mi 555 an thi a, thihna thleng zawng zawng atanga chhutin 16.7% a tling a. 
    3-naah chuan rannung chi hrang hrang seh vanga thihna (infectious and parasitic disease) niin he natna vanga thi hi mi 494 an awm a, hei hi thihna thleng atanga chhutin 14.9% a ni. Thawk lama harsatna thleng (respiratory system) chu pali na niin mi 456 an thi a, 13.7% a tling bawk. Thihna thlentu lian 5-na chu cancer kaihhnawih (neoplasm) niin he natna vang hian mi 424 an thi a, hei hi 12.8% a tling a ni.