Aizawl: Kum 2021 aiin nikum 2022 khan Mizoramah mahni intihlum an tam zawk a. Mahni intihlum zingah hmeichhia aiin mipa an tam fal hle.

Chhinchhiahna atanga a lan danin kum 2021 khan Mizoramah mahni intihlum mi 65 an awm a, heng zinga 57 hi mipa niin hmeichhia 8 an awm. Kum 2022 khan Mizoramah mahni intihlum hi mi 125 awmin heng zinga 104 hi mipa an ni a, hmeichhia intihlum 21 an awm bawk.

Mahni intihlum hi Aizawl district ah tam berin kum 2021 khan mi 34 leh nikum 2022 khan mi 52 an awm a. Chhinchhiahna atanga a lan danin mahni intihlum hi kum 2 chhung hian district tinah an awm vek a ni.

Mizoram Police chhinchhiah danin kum 2020-2021 khan Mizoramah tualthahna tum 24 leh 2021-2022 ah tum 31 a thleng a. Tualthah tumna (attemt to murder) hi hemi kum 2 chhung hian tum 19 ve ve a thleng bawk.