Aizawl: Mizoram sawrkar a Taxation department chuan kumin April - November (thla riat) chhungin chhiah chi hrang hrang Rs. 6,48,59,53,254 an hmu tling tawh a, chu chu 2022-23 a chhiah hmuh beisei zat (target) Rs. 7,30,03,51,000 atangin zaa 88.84 a ni.

Chhiah chi li - GST, profession tax, sales tax leh entertainment tax lak thin a ni a, kumin thla riat chhungin, GST-ah Rs. 556,36,24,266, profession tax-ah Rs. 12,40,67,837, sales tax-ah Rs. 79,79,22,985, entertainment tax Rs. 1,16,876 leh chhiah dang atangin Rs. 2,21,290 an hmu tawh.

Covid leng vangin kum 2020-21 chhung khan mi mal leh sawrkarin harsatna hrang hrang an tawk a. Taxation department pawhin tax revenue a hmuh thin angte a hmu pha lo nasa hle a. April, 2020-a an chhiah hmuh chu Rs. Vbc. 14.35 chiah a ni.

Hetiang dinhmuna an din avang hian kawng hrang hrangin tan an la a, tax return file lote reminder-te pein, a theih ang angin an tanpui a. Tax deduction at source (contract hna atanga tax chhun luh)-te pawh theih ang anga chhuia hma an lak hnuah Covid leng te a lo ziaawm ta bawk nen, tun dinhmunah chuan chhiah hmuh a tha chho leh tawh nia thuduawn a ni.

Chhiah hmuh dan : 2022-23 (in Rs)
Thla                 Hmuh zat
April                90,46,82,225
May                 93,46,38,881
June                80,00,86,741
July                 64,35,80,409
August            88,02,93,767
September      66,30,28,736
October          93,01,86,839
November      72,94,55,656