Aizawl April 21, 2024 : Taxation department-in kum liam ta, 2023-24-a target an neih zat, Rs. Vbc. 1098.50 a nih laiin, chhiah an hmuh zat chu Rs. Vbc. 1,112.58 a tling a, Rs. Vbc. 14.08-in an khum.

Mizoram sawrkara taxation department hian chhiah chi hrang hrang - GST, profession tax, sales tax, entertainment tax leh thil dang atangin chhiah a la thin a, chhiah hmuhna pui ber chu GST a ni.

Department-in kumin kum tira target a neih zat chu Rs. vbc. 1,000 niin, target an neih hi tihsan (revise esctimate) niin, Rs. vbc. 1,098.50 target pek an ni a. Chhiah an hmuh zawng zawng Rs. Vbc. 1,112.58 a tling a, revised estimate-a target siam chu Rs. Vbc. 14.08-in an khum.

Kum 2023-24 chhunga chhiah hmuh zat chu 2022-23 chhunga an hmuh aiin Rs. Vbc. 91.92 (9%)-in a tam zawk bawk.

Kum liam ta, 2023-24 chhunga chhiah an hmuh tam ber thla chu April, 2023 niin Rs. 1,34,78,34,419 an hmu tling a, an hmuh tlem ber thla November, 2023-ah Rs. 63,53,71,252 an hmu.

Taxation department hi May 20, 1988 khan Excise Department atanga indangin sawrkar tan vawiin ni thlengin revenue la luttu department pawimawh ber a ni.

Department hi commissioner of state tax kaihruaihna hnuaiah zone 14-a then a ni a. Aizawl district-ah zone pali awmin district dangah zone pakhat theuh a awm a. District thar pathum - Hnahthial, Khawzawl Ieh Saitual-ah zone thar siam a ni tawh bawk.