Aizawl September 1, 2024 : Nikum khan Mizoramah nau piang 27,180 an awm laiin thi 9,037 an awm bawk a. Nau piang zingah mipa an tam zawk a, thi zingah pawh mipa an tam zawk.

Economics & Statistics Department-in tun hnaia ‘Annual Report of Registration of Births & Deaths Mizoram, 2023’ a tihchhuah atanga a lan danin nikum chhunga Mizoram nau piang zinga 14,071 hi mipa an ni a, hmeichhia 13,109 an awm bawk a, piang (birth rate) hi 18.89% a ni.

Report tar lan danin nikum chhung khan mipa 1,000 zelah hmeichhia 931.6 piang anga chhut a ni a. Nikum chhung vek khan Mizoram pumah thi 9,037 an awm a, heng zinga 5,877 chu mipa an ni a, hmeichhia thi 3,160 an awm bawk a, thi (death rate) hi 6.28% a ni.

Nikum chhung vek hian naupang thi 360 awmin naupang thihna (infant mortality rate) 13.25% a ni a. Nau thi saa piang 88 an awm bawk.

ZALEN zawhna chhangin Economics & Statistics Department thawktute chuan Europe, Japan leh Korea ramah pawh nau piang an tlem vang hian sawrkar an mangang mek niin an sawi a. Nau piang tlem chhan chu eizawnna leh hna tha duh vanga nupui/pasal nei duh lo te, nupui/pasal inneih tlai vanga fa neih tam theih loh vang leh retheihna vanga fa neih tam lohte chu a chhan ber nia an hriat thu an sawi.

2023-a piang & thi

District   Piang   Thi

Mamit   1876   407

Kolasib   1616   656

Aizawl   10727   4142

Champhai   2040   626

Serchhip   645   386

Lunglei   3123   954

Lawngtlai   3919   707

Siaha   1537   417

Saitual   904   377

Khawzawl   423   171

Hnahthial   370   194

Total   27180   9037