Aizawl October 5, 2022 : MPCC President Lalsawta chuan, Mihring lei theiha an ngaih che u chuan Sal emaw, Nawhchizuar ang lekah an ngai che u tihna a ni. Kan ram hi la siam theih a ni a, chumi tur chuan 2023 MLA General Election tur hi a pawimawh, ram siamthat duh te chuan 2023 inthlanah siamthat an duh a ni tih an vote hmanga lantir turin mipui a chah.

MPCC Elected Office bearer ten Khawchhak tlangdung an fannaah nimin leh vawiin khan Saitual leh Khawzawl district an tlawh a, he huna thusawitu MPCC President chuan, "Khawzawl district leh Saitual District thar hi kan lawmpui takzet che u a. MNF-in a pek an tum tawh a, a thuam famkim hna chu Congress Party-in kan tum ve thung ang," a ti.

Lalsawta chuan, "Dinchhuah tuma tan la mekte puih hi a nuam kan ti a, kan tanpui zel dawn a ni. Kan Manifesto lian ber pawh a ni bawk. Kawng tinrenga eizawnna ngelnghet siam hi kan tum a ni a. Mizoten ram kan nei, mipui kan nei bawk, chumi enkawl tur sawrkar tha chu kan mamawh ber a ni. Kan rilru puthmang, kan ngaihtuah dan, kan ngaihhlut zawng hi kan thlak a ngai a, kan ram hi a siam that theih a ni tih hi kan pawm a ngai. 2023 kum tawpah kan inthlang dawn. Kan chhiah tlingkhawm dik lo taka lo suasamtute, chutiang avanga lo hausa te chuan mipui sum an eisak hmang khan min lei an tum dawn, kan vote lei an tum dawn. Heng mite hian i vote ringawt lei an tum a ni lo, nangmah kha lei che a tum a ni zawk. Mihring lei theih - Sal emaw, Nawhchizuar ang lekah an ngai che tihna a ni. Lei theih i ni lo a, Mizoram siamtha turin i duhna ngeiah vote i thlak thei, i rinawmna kha lo hralh suh ang che. Kan ram hi kan la siam thei, chumi tur chuan 2023 MLA General Election hi a pawimawh a ni. 2023 election-ah hian ram siamthat i duh a ni tih kha i vote hmangin lo lantir ang che," a ti.

MPCC President chuan, "Congress kan sorkar a nih chuan thlai chin uarna hmun bik area kan siam ang a, chung thlai chingtute mamawh leh an mamawh intawmte chu Tang Puihna hmangin kan pui dawn a ni. Tanpuina hi nuai bi atanga mamawh intawm, kawng, electric, tuilak, etc siam nan vaibelchhe tel thlengin kan tanpui dawn. Sawiselna tur ringawt zawnga lo chang thinte chuan he ruahmanna hi lo sawisel rawh se, mahse hei hi kan ti dawn. He hnam hi a dingchhuak thei, min daltu chu keimahni tho hi kan ni. Mi thaten engmah an tih duh tlat loh chuan sual hian thatna hi a hneh thin. Mi thaten ram siamthatna hi kan vei a, theihtawp kan chhuah a ngai," a ti bawk.

MPCC Vice President Lal Thanzara pawhin thu sawiin, "Min lo enchhin ve teh u tiin mi thenkhat an inzuar mek. Mahse, an CM candidate ngei pawh hi party hrang hrang leh bial engemawzatin kan lo enchhin tawh a, enchhin tlak a ni lo tih a takin kan hre tawh. CM ni thei tur Party leader pathumte hi en ula, eiru ngai lo, sum enkawl thiam, mi rinawm Pu Lalsawta aia thlan tur zawk reng reng an awm lo. Rorelna dik lo hnuaia kan awm mek hi siamthat kan duh a, kan ram dam lo tidam tur hian thawhpuiah Mizoram mipuite ka sawm a che u," a ti.

MPCC Treasurer Zodintluanga Ralte, MLA chuan, "Sawrkar hnathawk anih lai leh Minister a nih lai pawha sawisep kai lo Pu Lalsawta a lo lang a, Congress Party-ah mipuiin rinna an nghat chho ta tlat. Minister leh MLA eiru an awm chuan 'ka ban ang' ti ngam hruaitu kan nei. Kei hi Treasurer ka nih avangin ka him dawn chuang lo. Eirukna laka kan fihlim lo a nih chuan min ban mai dawn a ni. Chutiang ti ngam chu party dangin hruaitu an nei ve lo. That loh theih lohna bawm hi kan din ngei dawn a ni," a ti. 

MPCC Elected OB-te District tin tlawhchhuah programme-ah hian district 11 zinga district 8 an fang tawh a. Tun tuma Khawchhak Tlangdung Fan Programme-ah hian Saitual, Khawzawl leh Champhai District fan leh a ni.