Kumin chhung Covid-19 vangin Mizoramah mi 7 an boral tawh a, heng vanduaina tawk te hi May thla chhunga boral vek an ni. Thla 6 chhung Mizoramin Covid-19 vanga nunna chan kan neih loh hnuah May thla ah hian vanduaithlak takin mi 7 an thi a ni. Vanduaina tawk zinga a upa ber hi kum 79 anih laiin a naupang ber chu kum 7 a ni thung.

 

Zalen thudawn danin Covid-19 vanga Mizoramin vanduaina a tawh dan chu May ni 1, 2023 chawhma dar 11:20 khan Thanthluaii (63), Saron Veng, Aizawl chu Covid-19 vangin LRM Hospital-ah a boral, October ni 29, 2022 hnu a Covid-19 vanga thi kan neih leh hmasa ber a ni. May ni 5.5.2023 zing dar 5:30 khan Vanlalrammawia (70), Zuangtui, Aizawl chu Covid Pneumonia vangin SRHF-ZMC ah a boral. Zonunmawii (36), Bukpui khua chu ni 6.5.2023 chawhnu dar 1:30 khan Covid Pneumonia vangin ZMC-SRH, Falkawn-ah a boral. Khawlliani (79), East Lungdar khua, Serchhip District chu ni 11.5.2023 chawhnu dar 2:10 khan East Lungdar Primary Health Centre(PHC) ah Covid-19 vangin a boral. Sangzuala (48), Zuangtui, Aizawl chu ni 13.5.2023 (Inrinni) zan dar 6:40 khan Covid-19 vangin LRM Hospital ah a boral. Malsawmzela (7), Thingsulthliah chu Covid-19 Pneumonia vangin May ni 15, zan 8:30 khan ZMC-SRH, Falkawn-ah a boral. Ruthi Lalthansangi (36), Chanmari, Aizawl chu ni 27.5.2023 tlai dar 3:20 khan Covid-19 vangin ZMC-SRH, Falkawn-ah a boral.

 

Integrated Disease Surveillance Program hotute sawi danin April thla chhunga hri kai hmuhchhuahte Genome Sequencing Result dawn tawhah Omicron variant chi thum – XBB.1.16.1, XBB.1.16 leh XBB.1.9.1 hmuh a ni a, heng zinga pahnih - XBB.1.16.1 leh XBB.1.16 te hi variant tharlam lehzual niin Omicron variant dangte aiin inkaichhawn a awlsam zawk a, naupang leh kum upa lamah a thawk bik tih sawi a. Thawkna dawt hnuailam a thlen thlak theih avangin a danglam bik tih sawiin mipuite tan chiaina tur erawh a awm lova, Covid-19 laka invenna tur atana tih leh tih loh turte tha taka zawm a pawimawh hle thu an sawi bawk.

 

Zirtawpni kalta khan Covid-19 vei rinhlelh samples 56 test atangin positive 22 hmuhchhuah a ni a, hengte hi Aizawl dist ami 10 leh Champhai dist ami 12 an ni a. Hetih lai hian dam taka chhuak mi 6 an awm bawk a, nimin thleng khan positive enkawl lai 41 an awm a ni.

 

Mizoramah sample test tawh 19,95,876 awmin positive tawh zat chu 2,39,453 an ni a. Covid vanga thi mi 733 an awm tawh bawk.