February 27, 2024; Finance minister Lalduhoma'n kum 2024-25 chu sum leh inrenchemna kum atan hman tum a ni tih sawiin, "Fiscal deficit tihhniam leh theih tawpa kan leiba sang lutuk tihhniam hi kan tum ber a ni dawn," a ti.

Vawiin Assembly Session a 2024-25 budget a pharh-ah thusawiin chief minister ni bawk Lalduhoma chuan, kum 2024-25 a sum puk tur public debt chu Rs. vbc. 697.69 zetin an tihniam dawn tih a sawi a, "Chumi atan chuan a bul tan nan kan sum hmanna te thlirin tul baka kan hmanna nia hriatte tihtawp leh tihhniam kawngah hma kan la dawn a ni. He programme avang hian state pawisa hmanga project lian tham tak tak, counterpart funding tam tak theh chhuah ngai ang chi chu he sawrkar kum chhung hi chuan kan insum rih dawn a ni," a ti bawk.

Finance minister budget pharh a thil pawimawh thenkhat:

1. Kum 2024-25 chhunga sum hmuh tur beisei zawng zawng chu Rs. vbc. 14412.12 a ni. Kum kal mek 2023-24 ruahmanna Rs. vbc. 14209.95 aiin 1.42% in a pung hret.

2. 2024-25 chhunga sawrkar sum puk tur zat ruahman chu Rs. vbc. 1992.03 a ni.

3.Sawrkar flagship programme, 'Bana kaih' (Hand Holding) policy hmanga ram chhunga kuthnathawktute tihhmasawnna turin Rs. vbc. 200 ruahman a ni a, he policy kaihhnawih department te chu an scheme leh proposal te a zirin sawrkarin a tul angin sum a pe dawn a ni.

4. Thingtlang lam mi khawsak harsa zualte khawpuia an boralin, an ruang phurh hawna tur Rs. vbc. 5 ruahman a ni a, social welfare department kaihhruaina hnuaiah buaipui a ni ang.

5. Healthcare lama indaih lohna phuhruk nan 2024-25 atan Rs. vbc. 20 dah a ni.

6. Power generation (siamchhuah lam) leh power supply mumal zawka kalpui a nih theih nan Rs. vbc. 20.13 dah a ni bawk.

7. Inkalpawhna kawngpui leh leidawh thawm that ngaite thawm that nan kum 2024-25 chhunga hman turin Rs. vbc. 100 dah a ni.