ZALEN September 23, 2026: Mizoram Pro -Active Governance and Timely Implementing (Mi-PRAGATI) Meeting vawi 6 na chu vawiin khan CM Conference Hall-ah Chief Minister Lalduhoma kaihhruaiin neih a ni.

He hunah hian an meeting hmasaa an lo rel tawhte bawhzuina an thlirlet a, chu mi hnuah hmasawnna hnathawh mek dangte enhona an nei.

KMMTTP Mizoram chhunga thawh tawh chin, tuna chhe leh tawh tak chu a rang lama siamtha turin, he meeting-a tel Ministry of Road Transport & Highways aiawhte chu hriattir an ni a. Zangnadawmna la chinfel lohte pawh ching fel thuai tura ngen an ni. Ministry of External Affairs hnuaia thawh Paletwa – Kaletwa – Zochachhuah inkar pawh report ngaihthlak a ni a. Paletwa – Zorinpui inkar kawngpui thawh mek hi km 109.2 a thui a ni a, tunah hian Physical Progress hi 23.35% niin Financial Progress chu 30% a ni.

Sairang atanga Hmawngbuchhuah thlenga rel kawng sial tur chungchang Railway lamin an hmalak tawh chin an report a, Sairang rel station tihchangtlunna hna thawh mek pawh sawifiahna an nei a, Railways te hmalakna chungchang bik hi hun hranah Chief Minister kaihhruainain la meeting leh tur a ni ang.

Indo - Bangladesh Border Fencing cum road, Rajiv Nagar Segment chungchang an sawiho a. Online hmanga meeting-a tel Ministry of Home Affairs aiawhten hma an lak tawh chinte sawifiahna an nei a. Kawng chhe tawh lutuk chu a rang lama siam that a tul thu tarlan a ni a, harsatna dangte pawh sawi chhuah a ni.

Hengte bakah hian Cyber Crime leh digital arrest chungchanga Mizoram State Cyber Crime Coordination Centre hmalakna leh hnathawh te, Aizawl to Tuipang National Highway hnathawhin a nghawng, la chin fel loh thil thenkhatte an sawi bawk.

An thil relte umzui dan tur ruahmanna an siam a, meeting neih leh hunah enzui leh a ni ang.

Meeting-ah hian PWD Minister Vanlalhlana, EF&CC Minister Lalthansanga, Agriculture & Farmers Welfare Minister PC Vanlalruata leh official pawimawhte an tel a. Online-in Delhi leh Mizoram hmun hrang hrang atangin, agenda kaihhnawih official pawimawhten an zawm a ni.