Aizawl January 26, 2025 : Mizorama damdawi in lian ber leh mipui pan tam ber, Civil Hospital, Aizawl (CHA)-ah nikum chhung khan damlo inentir mi 5,03,956 an awm a. Inentir zinga 4,53,960 hi OPD a inentir an ni a, a dang 49,996 hi casualty (emergency) a inentir an ni.

CHA-a damlo inentir zingah hian Medicine OPD pantu an tam ber a, mi 83,895-in an pan a, Hei hi CHA-a damlo inentir zawng zawng atanga chhutin 17% an tling a ni.

OPD danga damlo inentir tam zual dangte chu hmeichhe lam natna (gynea & obst.), inzai (surgery) leh mit (eye) te an ni. Damlo enkawlna (ward) zingah emergency OPD chu lun berin chawhrualin khum 101.90% luah khat reng ang an ni a, female medical ward 97.65% leh ENT 96.04% ten an dawt a ni.

Nikum chhung vek hian CHA-ah hian nau piang 3,441 an awm a, heng zinga 1,747 hi mipa an ni a, hmeichhia 1,694 an awm bawk.

Nikum chhung khan zai pui (major operation) tawk mi 7,260 awmin zai tenau tawk mi 10,852 awmin zai tawk hi an vaiin mi 18,112 an awm a. Mitthi 702 an awm bawk.

Nikum chhung veka state pawna damlo inenkawl tura thawn chhuah (refer) zat chu 2,688 an ni.