ZALEN September 10, 2026: Mizo Zaimi Insuihkhawm (MZI), General Headquarters buatsaih 2nd Inter High School & Higher Secondary School beat contest chu vawiin khan zawh a ni a, St. Pauls Higher Secondary School band 'Count 2 Five' te chu pakhatna an ni.

Mount Carmel School hminga chhuak Carmel Band chu pahnihna an ni a, pathumna pawh Mount Carmel band tho Sereine ten an ni. Intihsiaka pakhatna hian Rs 70,000 an dawng a, pahnihna-in Rs 50,000 leh pathumna in 30,000 an dawng a, a bak sawm pahnih ten Rs. 10,000 theuh an dawng bawk. 

Mimal chawimawina-a lawmman la te chu : Best Vocal - Lalchhanchhuaha, Rosebud Band 2, Rosebud School ; Best Guitar - Harry Lalruatfela, Count 2 Five, St Pauls HSS ; Best Keyboardist - Lalrinsanga Pachuau, Carmel Band, Mount Carmel School; Best Bassist - Lalhmingmawia, Avaia, Govt Mizo HSS leh Best Drummer- H. Lalremruata, Carmel Band, Mount Carmel School te thlan an ni.

Mizo Zaimi Inzawmkhawm(MZI) General Hqrs buatsaih' 2nd Inter High School & Higher Secondary School Beat Contest 2026 -ah hian School hrang hrang atangin beat group 39-in an Demo video an thehlut a. Endik tuten final round lut Band 15 (sawm panga) an thlang chhuak a, anni hian nimin leh vawiin khan Vanapa hall ah final round inelna an hmachhawn a ni. 

Audition round ah hian Aizawl District pawn atangin Lunglei , Hnahthial, Saitual leh Mamit District atang ten tel an awm a, Final Round inelna hmachhawn te chu :

1. THEOKRATZ - Govt Mizo HSS

2. BAND2 - Rosebud HSS

3. ZOTRIBE - Springfiled HSS

4. SEREINE - Mt Carmel HSS

5. CHRIST KINGDOM - Christ Kingdom HSS

6. REVERIE - St. Pauls HSS

7. SEGNO - Govt Saitual HSS

8. BAND 1- Rosebud HSS

9. REMEDY FOR CHRIST - Synod HSS

10. PASSIONNE - St. Pauls HSS

11. BAND 1- Staines Memorial

12. CARAMEL BAND - Mt. Carmel HSS

13. AVAIA - Govt. Mizo HSS

14. St.ANDREWS SCHOOL - St. Andrews School

15. COUNT 2 FIVE - St. Pauls HSS