Cristiano Ronaldo-a nu Dolores Aveiro chuan UEFA Nations League-a Switzerland leh Portugal te inkhel chu a hmunah a chhim ve a. He inkhelhah hian a fapa Ronaldo chuan a international goal 117 tlinna turin goal hnih thunin Swiss lakah 4-0 in a pawl te hnehna a chan pui a hmuhin a nu Aveiro-i chu lawm avangin a tap hial.  

Kum 37 mi Ronaldo hian minute 35-naah a goal khatna a thun a, he goal hi Diogo Jota siam sak a ni. Minute nga chauh a liam tihin Portugal captain hian a goal hnihna a thun leh a, a hmuna tawiawmtu a nu Dolores Aveiro chu a fapa goal thun vanga lawmin, a mittui dang zo lo.   

Ronaldo bakah hian Joao Cancelo leh William Carvalho te pawhin Portugal tan goal khat ve ve an thun ve bawk a, Qatar FIFA World Cup khel tura an inpuahchahna kal zelah Portugal chu an tluang rih hle. 

Ronaldo hian season liam ta chhung khan club level-ah harsatna a tawk nual chungin United tana goal thun tam ber niin goal 24 zet a thun a. Mimal angin chetha viau mah se, season tawpah Manchester United hian an beisei trophy pakhat mah an hlawh chhuak zo lo. Tunah hian Red Devils hian coach thar nen indin thar tumin hma an la mek a, Ronaldo pawhin Old Trafford lama cham chhunzawm turin thu tlukna a siam tawh.  

Cristiano Ronaldo hian club leh ram tan a khel chhe lutuk ngai lova, tunah hian kum tawp lama Qatar World Cup khel turin an inpuahchah mek a, kum 37 mi hian 2016 khan Portugal hi European Championship trophy a chawipui tawh a, a hun tawp dawnah world cup hi a chawi pui leh thei a ngem tih chu mi tam tak zawhna a ni.