ZALEN September 15, 2026 : BJP Mizoram President Dr. K. Beichhua chuan vawiin khan BJP office-ah chanchinbu mite kawmin Prime Minister Narendra Modi-a piancham pual leh mipui tana rawngbawlna kum 25 tlin lawmna pualin India ram pum huap ‘Sewa Sankalp Abhiyan’ chu September ni 17 atanga October ni 17, 2026 thleng hman tur a nih thu a sawi.

He campaign hi “Jan Seva Hi Prabhu Seva” tih thupui hmangin kalpui tur a ni a. Narendra Modi-a’n Gujarat Chief Minister a nih atanga Prime Minister a nih thlengin mipui tana rawngbawlna kum 25 a tlin lawmna pualin thla khat chhung hman tur a ni a ti.

Dr. K. Beichhua chuan he campaign-in a tum ber chu mipui tana rawngbawlna neih tam, tlawmngaihna, PM Schemes a tam thei ang ber puanzar leh mi retheite dinhmun ṭhaa chawikan a ni a ti.

Mizoramah chuan September ni 17-ah Thisen Pek Rûnpui neih tur a ni a, hemi zan dar 7-ah “Aashirwad Ka Diya” programme hmangin lawmna hun hman a ni dawn a. Zirlaite tana lemziah leh thusawi intihsiak, Anganwadi leh ASHA thawktute chawimawina, welfare schemes inzirtirna camp leh Viksit Bharat 2047 hmathlir tihlarna tur programme hrang hrang pawh buatsaih tur a ni.

BJP Mizoram chuan he campaign hi political programme chauh ni lovin, mipuite nena inpawhna, welfare schemes tihlarna leh ram siamnaa mipui tel ve zelna tur rawngbawlna a nih thu a sawi a, BJP workers, duhsaktu, tlawmngai pawl, ṭhalai, zirlaite leh mipui zawng zawngte tel turin sawmna a siam.