ZALEN, Aug. 30, 2026: A vawi thum nana Indian football-a mi mal chawimawina ngaihhlut hlawh bera chhal, FPAI Indian Player of the Year dawngtu, Lallianzuala Chhangte chuan, “A hmasa ber kha chu a special a, a vawi thumna erawh chuan awmze danglam bik a keng tel a. Pathian rinawmna min hriat nawntirna a ni,” a ti.

Inrinni zan khan FPAI Indian Football Awards 2026 chu West Bengal khawpui, Kolkata-a City Hotel-ah sem niin Mizo tlangval hian chawimawina ngaihhlut hlawh ber chu a vawi thum nan a dawng a. Kum 2009 atanga sem tan chawimawina hi Indian player tha bik, Sunil Chhetri dawta dawng ngun ber a ni ta.

India captain hlui, Football Players’ Association of India (FPAI) dintu, Bhaichung Bhutia hnen atanga chawimawina dawngtu, Lunglei tlangval chuan Pathianni tlai khan a Instagram-ah, “Ka Lalpa leh Chhandamtu Isua Krista hnenah ropuina zawng zawng ka hlan a. Ka inkhelh tawh chinah min vawng reng a. Ka beisei ngai loh lai pawhin ka hriatthiam phak rual lovin hna a thawk a ni,” a ti.

Mizo Flash chuan a chhungte, season liam ta thlenga a khelhna, Mumbai City FC-a a thawhpui, khelhpui te leh coach te, amah buaipui leh fan-te chungah lawm thu a sawi a, “In mi puihna tel loh chuan tun hi ka thleng lo vang,” a ti.

Lza hian kum 2023 leh 2024 khan he chawimawina hi kum zawnin a lo dawng tawh a, kum khat a awl hnuah a dawng leh ta.

Hriat theuh angin 2025-26 season kha Indian football tan hun duhawm lo niin season pawh an tan tlai a, Lza hian Mumbai City FC tana Indian Super League-ah vawi 13 a khelhah goal li a thun a ni.

Mumbai City FC chhuahsana Bengal club hlun, Mohun Bagan zawm ta, Lza chawimawina dawn hi season liam ta zela che thate zel hnena hlan niin an khelhpuiten an thlan chhuah an ni a, ngaihhlut pawh a hlawh bik. 

FPAI dintu, Bhaichung-a pawhin, “He chawimawina hi India-a footballer zawng zawngte tana lian ber leh zahawm ber niin ka ngai,” a ti a. “India-a league hrang hranga khel professional footballer-ten vote an thlakna a nih avangin a danglam bik a. A hre thiam leh khel ve ngeite thlan a ni tlat a ni,” a ti.