Aizawl March 31, 2024 : Chief Secretary Dr. Renu Sharma, IAS chuan office memordandum tichhuakin biometric attendance system hman tur a nih tawh avangin sawrkar hnathawkte chu tlai lo tur leh a hun hmaa office chhuahsan lo turin a hriattir.

Office memorandum-a tar lan a nih danin, CSS (Conduct) Rules, 1964 Rules 3 (i) (ii)-a tar lan angin sawrkar hnathawkte chuan engtik lai pawhin hnathawk tura inpekna an vawng reng tur a ni a, office kai hun ngai pawimawh lo sawrkar hnathawk lakah thununna lek theih a ni.

Mizoram sawrkar chuan biometric attendance system hman a rel a. Mizoram secretariat-a sawrkar hnathawk zawng zawngte chuan an biometric an register vek tur a ni a, secretariat chhunga hnathawktute chu an thlen leh chhuah dawnah biometrict khawlah scan vek zel an ni ang a, checking officer pawh ruat vek tur an ni.

Checking officer-te chuan officer/staff-te che vel, office pawn lama meeting-a tel emaw, official duty-a an kal dante an record vek dawn a, office kal tlai emaw, office chhuahsan hma emaw chu ni chanve casual leave la anga chhinchhiah theih an ni ang a. Danin a sawi angin, loh theih lohna avanga office tlai/chhuak hmate erawh hriatthiamna a awm thei ang.

Administrative head zawng zawngte chuan April, 2024 atangin kar hnih danah action taken report, chief secretary hnenah an thehlut thin ang a. Heng ruahmanna hrang hrangte hi zawm ngei turin administrative department head zawng zawngte hriattir an ni.